Tlai dar 3:00-ah India Vs West Indies

India-in vawiin tlai dar 3:00 hian Pakistan an hnehna hmun Old Trafford Cricket Ground-ah West Indies an hmachhawn dawn.

Cricket World Cup khelh mekah Virat Kohli hoten hneh loh an la tawng lo a, amaherawhchu an match hnuhnung berah table mawgphaha awm Afghanistan an hneh ṭawk avangin Men in Blue hian insiamṭhat an mamawh hle.

India hian ruahsur vangin 'indoor'-ah inpuahchahna an neih a ṭul a, Pakistan an hneh ṭum pawh khan ruahsur vangin Duckworth–Lewis–Stern method hman a ni.

Tun inelnaah India leh New Zealand chiahin hneh loh an la tawng lo a, team ṭha pahnih inhmachhawn ṭum hian ruahsur vangin result a awm thei lo. Chutihrualin vawinah erawh expert-te'n khua a ṭhat ngei an beisei a, buaina awm loin over 50 an khelh theih rin a ni.

Kum 2011 khan Cricket World Cup-ah India an champion a, hemi ṭuma captain chu Mahendra Singh Dhoni a ni.

Tun ṭumah pawh MS Dhoni hian India hi a la ho a, amaherawhchu kum 37 mi a ni tawh avangin tun hma a tluk tawh bik lo. Afghanistan an hmachhawn ṭum khan panganaah awmin ball 52 a hmachhawnah run 28 chauh a siam a, a strike rate 53.85 chu ball 10 hmachhawn tling chinah a chhe ber.

Cricket ngainatu ṭhenkhat chuan, "MS Dhoni khan 'Ganguly' a paih chhan chu a kum a upa tawha a ngaih vang a ni a, khatih laia Ganguly kha tun hnaia kan hmuh Dhoni aiin a ṭha zawk. Indian cricket tan rah ṭha a duh chuan a chawlh a ngai," tiin na takin an sawisel.

Dhoni tan sawiselna hi a vawi khatna a ni lo a, nikum khan England nen ODI series an khelh ṭumin target 323 an um. India captain hlui hian ball 125-ah run 79 chauh a siam avangin fan chauh ni loin expert thlengin an dem hle.

India hian squad-ah wicket keeper ṭha dang pahnih Dinesh Karthik leh Rishabh Pant te an la kawl bawk a, Dhoni hian thlak tur em chuan pressure nei lo mah se India mipui tih lawm nan a chet ṭhat a ṭul.

India hi batting leh bowling-ah an ṭha ve ve a, tun ṭumah chuan fielding-ah pawh an che ṭha hle. Tun inelnaah hian ball thlauh palh (dropped catch) vawi khat chiah an la nei a, Pakistan an hmachhawn ṭuma KL Rahul-a tihsual bak an la nei leh lo.

Men in Blue hi la chesual tlem ber an ni a, an hmelma Pakistan (14) chu ball thlauh ngah ber niin England (12), New Zealand (9), South Africa (8), West Indies (6), Australia (4), Bangladesh (4), Sri Lanka (3) leh Afghanistan (2) ten an dawt.

West Indies hian ball vaw na tak tak an kawl hnem a, chung zingah chuan Carlos Brathwaite hming lam hmaih a thiang lo. Brathwaite hian New Zealand lama six vawi nga leh four vawi li vuain run 101 a siam a, Windies hi hnehna chanpui thei lo mah se an khingpui leh tur tan chuan en liam chi a ni lo.

Windies hian Black Caps an hneh loh ṭuma Braithwaite-a mittui hruk hul nan India hneh ngei an tum dawn a; Chris Gayle, Shai Hope leh Jason Holder te an neih avangin India bowler-te tan pawh fiahna a ni thei ang.

June 27 , Ningani    West Indies    03:00 PM    India

June 28, Zirtawpni    Sri Lanka    03:00 PM    South Africa

June 29, Inrinni    Pakistan    03:00 PM    Afghanistan

June 29, Inrinni    New Zealand    06:00 PM    Australia

June 30, Pathianni    England    03:00 PM    India