CYMA Football-ah team 110 tel dawn

Suzuki Gixxer Inter Branch YMA Football Tournament-ah team 110 an tel dawn a, June 28 zan hian CYMA Hall, Tuikhuahtlangah Kick Off neih a ni dawn.

Veng/khua football hmanga inelna hi ṭhuang hniha kalpui a ni a, YMA leh Local/Village Council ang zawngin inelna hi neih ṭhin a ni. Tun hnaiah Local/Village Council inelna hi District FA-in a kalpui avangin Mizoram pum huap a ni lo a, district hrang hrang inelna zinga a lian bera ngaih NECS Cup chu Aizawlah khelh niin inelna hnuhnung ber kumina neih a nih khan team 66 an tel.

CYMA Football-ah hian CYMA leh Mizoram Football Association an thawhdun avangin Mizoram pum huap a ni a, team tel zat pawh a inthlau hle. Tun ṭumah pawh hian team 110 zet tel mah se inelna hnuhnung ber kum 2017-a neih a nih ṭuma tel zat 141 aiin team 31-in a tlem zawk.

Inelnaa team tel tam ber ṭum chu kum 2015 kha a ni a, team 191 zet an tel. Veng leh veng inelna ngaihhlut CYMA Football-ah hian kum 2003 aṭang khan team 100 an la tel tling ziah. CYMA Football 2017-ah khan Aizawl Venglai, Bawngkawn, Chaltlang, Chanmari, Chhinga Veng, College Veng, Durtlang, Hualngohmun, ITI Veng, Leitan, Lengpui, Ramhlun South, Republic Veng, Republic Vengthlang, Salem Veng leh Zawlnuam Bawrai ten last 16 an lut.

Tun ṭumah hian champion lai Ramhlun South leh quarterfinalist Republic Vengthlang te an inlan dawn lo a, team dang 14 te erawh an inlan leh ṭhap dawn. 

CYMA Football-ah hian vawi nga champion tawh Armed Veng chu nomawi chawi ngun ber an ni a; Electric Veng (3), Chaltlang (2), Dinthar (2), Ramhlun South (2), Kanan Veng (1), Lengpui (1) Republic Veng (1), Ramhar Veng (1) leh Zotlang (1) te an champion tawh bawk.