Copa America Rinkai Brazil inlan dawn

Zirtawpni zing dar 6:00-ah Copa America 2019 quarterfinal match hmasa ber khelh a ni dawn a, inelna thlengtu Brazil leh Paraguay te chu Arena do Gremio-ah an inhmachhawn ang.

Team 12 inlan zinga pali an tla tawh a, Asia khawmualpui aṭanga sawm luh pahnih Qatar leh Japan bakah Bolivia leh Ecuador te an tla. Venezuela, Argentina, Colombia, Chile, Peru leh Uruguay te an tlang thung a ni.

Copa America thlengtu Brazil hi inelna neih ṭan hma aṭanga champion tura rinkai an ni a, mahse an ram mipui beisei leh duh ang chuan an khel chhuak nghal lo. 'Boo' khum hial an tawh hnuah erawh tho chhuakin Peru 5-0 in an sawp leh thei tawh.

Inrintawkna sang tak nen Tite naute hian quarterfinal an khel dawn. Amaherawhchu, world champion vawi nga ni tawh tan Paraguay hi awlsam taka nuai liam ngawt theih an ni dawn lo, kum 2011 leh 2015 khan penalty shootout-ah Selecao hi an lo pet chhuak tawh a ni.

Nikum World Cup qualifier first leg-ah pawh ram pahnih hi 2-2 in an inhnehtawk a, second leg-ah erawh Philippe Coutinho, Neymar leh Marcelo te goal hmangin Brazil hian 3-0 in hnehna an chang thung. Tun ṭumah hian goal khungtu pathum zingah hian Coutinho chiah chhawr theihin a awm.

Group stage chinah Brazil leh Colombia te chiahin goal an chhuah lo. Tite naute hian chawhrualin ball possession 71% zel nei ang an nih bakah, goal khung tura hun ṭha insiam hnem ber an ni.

Tlarhnungah captain Dani Alves, Marquinhos, Thiago Silva leh Filipe Luis te an intlar ṭhin, si ban nghaktu chu Liverpool duhlai Alisson Becker a ni - anni ho hi khawih danglam an ni ngai lem lo. Paraguay lakah pawh nghet takin an inrem leh a rinawm, an innghahna kulhpui an ni leh ang.

Kum 58 mi Tite-a'n Fernandinho inhliam vangin Arthur Melo tan khelhna hmun a siamsak a, tun ṭumah hian hrem vanga Casemiro an chhawr theih dawn loh avangin Barcelona midfielder Arthur chungah mawhphurhna a awm nawn a rinawm. Tlarhma lamah chuan Roberto Firmino bakah Richarlison, David Neres, Everton leh Gabriel Jesus te hian hmun an inchuh leh dawn.

Paraguay hian hneh nei loin quarterfinal an lut! Eduardo Berizzo nuate hian Qatar lakah 2-0 a hma an hruai hnuah goal hnih an chhuah a, Asian champion nen hian 2-2 in an inhnehtawk.

La Albirroja (Paraguay sawina) hian Lionel Messi awmna Argentina hneh theihna hun ṭha an nei bawk. 1-0 in hma an hruai reng a, Argentina-in penalty an hmuh avangin 1-1 a ni. Chakna goal khung theih nan penalty hlawh chhuak ve mah se an hlah avangin point khat bawk an hmu.

An group match hnuhnung berah Colombia 1-0 in ngam lo mah se group danga pathumna dangte aia goal difference an neih ṭhat zawk avangin an tlang daih. Colombia an hmachhawn ṭum phei hi chuan goal zawnah vawi hnih chiah an pet thei a ni.

Paraguay tan hian attacking midfielder Miguel Almiron chu innghahna a ni leh dawn, ani hi an inkhel khaikhawmtu a nih ṭhin bakah a ṭhiante goal khung tur vawi hnih a siamsak tawh. Brazil tan Almiron dan beh hi hna pawimawh a ni dawn. Striker tawnhriat ngah, kum 36 mi Oscar Cardozo nge Bologna forward Federico Santander-a'n tlarhma luahlum zawk dawn tih hriatthiam a harsa.