Atletico-in euro maktaduai 126-in Felix an ngam

Atletico Madrid chuan Joao Felix lakluh tumin Benfica chu euro maktaduai 126 (£112.9m) in an dawr a, Portuguese club hian rawlthar duhawm chungchang hi an ngaihtuah zui ang.

Kum 19 mi Felix release clause hi euro maktaduai 120 a ni a, La Liga club-in an dawrna zat aiin a tlem zawk. Amaherawhchu Atletico hian a man hi instalment-a pek an duh. Spanish club hian Benfica hi an hmin thei a nih chuan Felix hi football history-a player manto pangana a ni dawn - Neymar, Kylian Mbappe, Philippe Coutinho leh Ousmane Dembele te chiah a tluk lo ang.

Benfica chuan, "Atletico Madrid hian Felix lak duhin euro 126,000,000 in an rawn dil a, kan zirchiang ang," tiin Portuguese stock market hnenah an thehlut. Felix hian nikum August thla khan senior team tan a khel ṭan chauh a, season liam ta khan goal 15 a khung. Porto youth team-ah pawh inzir tawh Felix hian tun thlaa Nations League semifinal-a Switzerland nen an inhmachhawn khan ram tan a khel ṭan a, inelna a hmachhawn hmasak berah an ram a champion pui nghal.

Europe club lian scout-te chuan Felix hi zirchiang fe tawh mah se khawvel huapa a larna tak erawh April thlaa hattrick a siam kha a ni. Portuguese rawlthar hian Europa League-a Eintracht Frankfurt nen an inkhelh ṭumin hattrick a siam a, Europe-a Portuguese player hattrick siam thei naupang ber  a ni a, Europa League record a ni bawk. Felix hi 5ft 11in-a sang a ni a, kum 19 mi chauh a nih avangin a ngaihsan Cristiano Ronaldo angin a sa a la inphut khat lo. Mi tam tak chuan Ronaldo hnua Portugal-a talent nei sang leh ber tiin an sawi a, Juventus forward Ronaldo bakah hian Benfica player hlui Rui Costa leh João Pinto te nen an khaikhin hial. Benfica player hlui Nuno Gomes chuan, "An inang lo. Ronaldo chu kum 34 mi niin khawvel player ṭha ber a ni a, Felix erawh kum 19 mi chauh a ni," tiin a sawi. 

Gomes chuan sawi chhun-zawmin, "Felix danglamna chu ball nen hian a inrem thlap. A fing em em a, a rem hria a, player danglam bik chu a ni," tiin a fak. Felix hian Atletico hi a zawm a nih chuan mawhphurhna hautak zet a nei nghal dawn. Diego Simeone kaihhruai team hian an thiampuipa Antoine Griezmann an chan dawn avangin Portuguese rawlthar hi France international nen khaikhin a ni dawn. Spanish club hian player pawimawh Juanfran, Diego Godin leh Lucas Hernandez te an chan tawh a, midfield-a an innghahna Rodri pawh chhuak tura ngaih a ni bawk.

Chutihrualin Atletico hian loan-a an chhuah player-te an lalet a; Real Madrid aṭangin Marcos Llorente, Mexican club Atlético San Luis aṭangin Nicolás Ibánez leh Porto aṭangin Felipe te an lalut tawh. Argentine manager Simone hoten Barcelona leh Real Madrid te elphak an la tum hle.