Trump-a'n US player a hau!

US president Donald Trump chuan USA hmeichhe team player Megan Rapinoe chu twitter kaltlangin a zilhhau a, "I ram chu i zah tur a ni," a ti. 

Kum 33 mi Rapinoe hian Hmeichhe World Cup-ah champion nomawi hawn pawh ni se US President chenna White House a tlawh ve loh tur thu a sawi. Donald Trump chuan, "Megan hian a ram mai ni lo, White House emaw he ram flag hi zah lo takin a ṭawng khum tur a ni lo. A bik takin ramin amah leh US hmeichhe team tana hna a thawh zozai hi a thlir tur a ni. 

"I flag ken kha chhuang takin chawi sang rawh. USA chu ropui takin a kal reng a ni," a ti a, Megan Rapinoe ṭawng danah a lungawi lo hle. USA forward Alex Morgan chuan inelna ṭan a nih hma khan President hnen aṭanga sawmna a pawm loh tur thu a lo sawi tawh a, Rapinoe khelhpui Ali Krieger chuan a ṭhiannu hi a thlawp thu a sawi ve bawk. 

US President chanchin ngah ve tak Trump hian Rapinoe chu a ṭawng chhuah hmaa hnehna chang phawt turin a ti a, a hnuah erawh US hmeichhe team chu France aṭanga World Cup nomawi an rawn hawn emaw hawn lo emaw White House-a leng tura a sawm hrim hrim tur thu a sawi thung.

Megan Rapinoe hi player chanchin ngah tak, a ngaihdan huaisen taka sawi chhuak ṭhintu a ni. NFL star hlui Colin Kaepernick thlawpin hnam hla sak laiin a ding duh lo tawh a, World Cup match an khelh hoa hnam hla an play-in a zawm duh lo bawk. 

US Soccer Federation khingtu US hmeichhe player 28 zingah a tel bawk a, an khin chhan hi mipa team-in anni aia match an khel tlem leh an hlawhtling lo zawk chunga an hlawh hnem zawk an duh loh vang a ni. Hmeichhe World Cup hi France-ah khelh mek a ni a, USA hian zanin dar 12:30-ah quarterfinal an khel dawn a, inelna thlengtu France nen an inhmachhawn ang. 

Nizan khan quarterfinal match hmasa ber khelh a ni a, Norway leh England inhmachhawnin he thu buatsaih a nih lai hian result kan hre hman lo.