Mourinho-a'n Magpies enkawl a tum lo

Rafael Benítez-a'n Newcastle United a chhuahsan hnuah Magpies hi Jose Mourinho nen sawi zawm ni mah se Chelsea boss hlui chuan enkawl a tum loh thu a sawi a, "Kei chu hnehna chan reng duh mi ka ni," a ti. 

Mourinho chuan, "Ka thil duh lohah hian ka chiang em em. Project phurawm tak, hnehna chang ngei tura beihna hmuna awm ka duh. Kum 10 contract pawh min pe se, table chanve chung lama awmah an lungawi mai chuan ka duh lo. Kei chuan hnehna chan reng ka duh a ni," tiin Magpies nen an inrem loh thu a sawi. 

Kum 56 mi Mourinho hi December 2018 khan Manchester United chuan a hna aṭangin an ban a, Old Trafford a chhuahsan hnu hian club enkawl a nei leh tawh rih lo. Portuguese manager hian Chelsea leh United bakah Porto, Inter Milan leh Real Madrid a lo enkawl tawh a, a kalna apiangah nomawi liantham chawi a nei zel - Magpies zawm a duh lo hi thil awm lo niin a lang hran lo.