FIFA-in Cameroon an en zui dawn

Football khawvela thuneitu sang ber FIFA chuan Hmeichhe World Cup last 16-a an chet dan avangin Cameroon an chhui chiang dawn a, African hmeichhe team hi an dinhmun a ṭha lo hle. 

Cameroon hian last 16-ah hian 3-0 in England hi an ngam lo a, video assistant referee thutlukna pahnih awmah an lungawi lo - inkhel chawlhsan mai tur angin an lang hial. Hei mai hi a ni lo, Yvonne Leuko chuan England winger Nikita Parris chu a kiuin a nghawk lui a, replay enin Augustine Ejangue chuan Toni Duggan chu chil a chhak khum ngei niin a lang a, Alexandra Takounda chuan England captain Steph Houghton a tlawh lui bawk. 

Cameroon player te hi hnawh­chhuah an ni lo vek a, an vannei hle. Mahse, khawvelin an chet dan a dem a, Confederation of African Football-a Women's football committee hotunu Isha Johansen chuan Cameroon hmeichhe team chet dan hi chhui chian ṭha a tih thu a lo sawi tawh. 

Johansen chuan, "Ka fanu hian footballer nih a chak a, mahse kha inkhel kha en se chuan netball player nih a duh zawk mai ang," tiin Cameroon player-te chet dan hi na takin a dem.