Pakistan-in New Zealand an hneh

Cricket World Cup-ah Pakistan chuan Nilaini khan New Zealand wicket rukin an hneh a, match hnih khelh hmabak la neiin semifinal lut thei dinhmunah an ding.

New Zealand-in vuak hmasak thlangin run 237/6 an siam a, Pakistan-in over 49.1-ah 241-4 siamin hnehna an chang. Sarfaraz Ahmed hote hian Afghanistan leh Bangladesh te an la hmachhawn dawn a, palinaa awm England phet thla thei an pun belh.

Vawiin tlai dar 3:00 hian Sri Lanka leh South Africa te Emirates Riverside, County Durham-ah an inkhel dawn. Lions, Pakistan leh England te hian palina dinhmun an inchuh dawn niin a lang.

Pakistan hian kum 1992 khan group match hmasa pangaah vawi khat chiah an chak a, mahse a hnuhnung pathumah an chak vek avangin semifinal an lut a, Melbourne-ah World Cup nomawi an chawi. 

Tun ṭumah pawh hian Pakis-tan hian West Indies, Australia leh India an hneh lo a, Sri Lanka nen an inkhel chu ruahsur vanga an khelh zawh theih loh bawk avangin an dinhmun hi a chhe hman hle. Tunah erawh inelna thlengtu England leh South Africa te an hneh hnuah an tawn hmaa hneh loh la tawng lo New Zealand an hneh a, beiseina thar an nei ta.

Edgbaston Cricket Ground-ah New Zealand tan Jimmy Neesham (97), Colin de Grandhomme (64) leh Kane Williamson (41) te che ṭha mah se Pakistan bowler Shaheen Afridi ngam loin Black Caps hian run 237 chauh an siam.

Pakistan hi a tir lamah talbuaiin Fakhar Zaman (19) leh Imam ul-Haq (9) te chan hma mah se pathumnaa awm Babar Azam chuan thi loin run 101-a siam a, Mohammad Hafeez (32) leh Haris Sohail (68) ten rawn thlawp ṭha bawkin ball nga dah bangin hnehna an chang. Hriatthiam har tak Sarfaraz Ahmed hote hian an khelh ṭhat niah chuan eng team pawh hneh thei tih an rawn lantir leh a, amaherawhchu 1992-a an mi hmasate sulhnu chhui tur chuan vanneih an mamawh thung ang.

Pakistan captain Sarfaraz Ahmed chuan, "Bowler zawng zawngin an vawm ṭha vek a, batsman lam pawh an che ṭha. Kan vai thawhrah a ni a, Babar khelh ṭhat ṭum kan hmu kan chakna chhanah a ngaih theih. Keini chuan 1992 lam kan ngaituah lo a, kan match khelh hmabak apiang zel kan ngaihtuah ang," tiin a sawi.

New Zealand captain Kane Williamson chuan, "League round-ah chuan match a tam lutuk a, chak vek theih a ni lo. Ka beisei aiin ball a sawt duh a, kan harsatna belhchhah turin an vawm dik bawk. A tawp thlengin beiseina kan nei a, chak lo mah ila lawmna tur a awm tho," tiin an vawi khat chak lohna tawng mah se hnualna tur a nih loh thu a sawi.

Pakistan bt New Zealand

Pakistan wicket rukin an chak

Toss-ah New Zealand an chak a, bat hmasak an thlang

Venue: Edgbaston, Birmingham

New Zealand    237/6 (50)

Jimmy Neesham    97*(112)

Colin de Grandhomme    64 (71)

Kane Williamson    41 (69)

Shaheen Afridi    28/3

Shadab Khan    43/1

Mohammad Amir    67/1

Pakistan 241-4 (49.1)

Babar Azam    101*(127)

Haris Sohail    68 (76)

Mohammad Hafeez    32 (50)

Kane Williamson    39/1

Trent Boult    48/1

Lockie Ferguson    50/1