Club dang chunga leng Man City

Manchester City chu Premier League champion a puan theih la ni chiah lo mah se nomawi an hnaih tawh hle. Pep Guardiola naute hian an mikhual Southampton 5-2 in an sawp a, pahnihna Manchester United aiin point 14 in an sang fal.

Kevin de Bruyne a awm chuan Man City ṭha sa kha an famkim a, forward Riyad Mahrez-a'n a thiam dan taka goal mawi vawi hnih a khung bakah Ilkay Gundogan pawimawhna sawi nep theih a ni lo, nuamsa takin point thum an hlawh chhuak.

Manchester khawpuia Southampton an lenluh hnuhnung zawkin goal kua an chhuah, an khingpui chu Man United an ni. Nilaini zan Etihad Stadium a Premier League inkhelah pawh an tlarhnung a pawp nasa hle.

Bruyne leh Mahrez ten goal hnih ve ve an khung a, midfielder Gundogan-a'n goal khat a thawh ve bawk. Saints tana James Ward-Prowse penalty khung leh Che Adams goal in an mualpho tur a hliah kuh phak lo.

Keeper Alex McCarthy-a'n chiang takin Phil Foden ti tlu mah se penalty a chawi lo hlauh. An beisei penalty hmu lo mahse Mahrez-a'n box pawn aṭanga a thiam dan taka a pet kum lut leh, box chhunga player pali hual vel kara a goal khung chu lawmna tur a tling.

League match khelh hmasak pakua an la neihah Man City hi vawi ruk an chak a nih chuan an champion chiang tawh dawn. Season bul ṭan fuh tak Southampton erawh an zuih, relegation zone aṭangin point sarih chauhin an him rih.

Penalty an hlawh loh vangin Manchester City manager Guardiola a lawm lo a, a naute khelh danah erawh a lungawi. Spanish manager chuan, "A tawpah 5-2 in kan chak avangin a lawmawm, 1-1 a nih laia penalty hlawh loh erawh thil mak tak a ni.

"Referee-te hi professional an ni a, an hna ṭha takin an thawk turah ka ngai. Keimahni chauh ni loin tun hnaiah thil mak a thleng fo. Tottenham laka Fulham goal pawm a ni lo te, Arsenal-in Burnley lakah penalty an hmu lo te kha thil mak a ni," tiin tun hnaia VAR tihsual nia a hriat a sawi lang.

Pep-a naute hian an match hnuhnung zawkah United chu 2-0 in an ngam lo, match 21 an chak tluang lai chu tawp mah se rahṭha a chhuah tur thu a sawi a, an match khelh leh hmasak berah a takin a lang nghal - chawm nun an tum ang.

City hian Inrinni zanah Fulham an hmachhawn zui leh dawn a, hnehna an chang a nih chuan Man United aiin point 17 zetin an sang fal hman ang. Anmahni hnaihtu Man United leh Leicester City te chu Pathianni zanah an inlan leh dawn chauh a ni.