Liverpool an mawi; ringhleltute an ngawi

Premier League-a beisei phak lo Liverpool-in Champions League lamah an thiam an la theihnghilh lo tih an pholang a, quarterfinal lut turin RB Leipzig chu 2-0 in an hneh. 

Liverpool tan Sadio Mane leh Mohamed Salah-ten goal khat ve ve an khung a, first leg-ah 2-0 a an lo chak tawh bawk avangin inkhel pahnih belhkhawmah 4-0 in Reds an chak.

Reds manager Jurgen Klopp chuan, "Zaninah kan khel ṭha em em a, kha kha kan mamawh tak chu a ni," tiin a sawi a, European football-a an result ṭha hi tualchhung football-ah chhawm nun theih an inbeisei ang. 

Liverpool hi Premier League-ah pariatna an ni mek a, top four an phak lohna chu point sarih a ni mek - Kop hoin Champions League nomawi chawi chunga season thara European football khelh an mitthla ṭan ang. 

Tun season-a Liverpool chet chhiat chhanah hliam lam rik a ngai leh ṭhin a, Jurgen Klopp-a'n squad a neih chhah tawk bawk si loh avangin a duh ang takin player a rem ngam ṭhin lo. 

Nilaini zan inkhelah erawh Klopp-a'n 'risk' a la a, Virgil van Dijk leh Joe Gomez inhliam avanga a hun tam zawk centre back-a hmangtu Fabinho chu a nuam tih berna midfield-ah dah a ni. 

Brazilian midfielder hi Thiago Alcantara leh Georginio Wijnaldum nen midfield-ah an inkawp a, Klopp-a'n Trent Alexander-Arnold leh Andy Robertson dinpui turin tawnhriat nei tlem Ozan Kabak leh Nathaniel Phillips chu huaisen takin a dah. 

Tlarhmaah hliam vangin Roberto Firmino a awm lo a, Mane leh Salah kawp turin hliam damkawr Diogo Jota dah a ni bawk. 

Jurgen Klopp-a'n thutlukna a siamsual lo - midfield-a RB Leipzig goal nawr tur chhu chat tura Fabinho a awm chiahin Reds game a danglam a, tlarhnung lamin tawnhriat nei tlem mah se Fabinho-a'n a tih tur a tih miau avangin Liverpool an talbuai lo. 

Midfield-ah Fabinho leh Thiago an awm avangin Premier League lama en hrehawm tak Liverpool tlarhma pawh tun hma angin an hriam leh ta niin a lang a, goal khung tura minute 70 an nghah thlen a ngaih avangin a hmawr bawk danah hmasawn belh erawh an la mamawh. 

Salah, Mane leh Jota-ten chawlhlawk hman hmain goal khungna remchang an nei vek a, Reds forward pathumin an tih ṭhat tawk loh piah lamah Leipzig keeper Peter Gulacsi-a'n a hna a thawh ṭhat tel avangin goal an khung lawk thei lo. 

Liverpool vanneihna erawh Bundesliga lama attacking football hmuhnawm tak pholang ṭhin Leipzig-in goal nawr kawnga player ṭangkai, full back Angelino an chhawr theih loh avangin goal nawr nat an harsat a, an hriam tawk lo bawk. 

Leipzig tan substitute Alexander Sorloth-a'n bar a tih per hnuah Liverpool-in goal an khung ta nge nge a, Salah chuan minute 70-naah ṭha taka ball lalutin, Leipzig defender pathum ven karah a khung.

Minute li a liam a, Liverpool bawk kan hmu nawn - Divock Origi-a ball siamsak duhthusam chu Mane-a'n harsatna nei loin a khung a, chak tur a chiang tawh. 

Budapest khawpuia Covid-19 vanga home game kheltu Reds-in 2-0 in hnehna an chang a, season thum chhunga a vawi hnih nana Champions League nomawi chawi an beiseina chu an chhi nung zel. 

Jurgen Klopp chuan, "Champions League kan khelh chhan chu champion kan duh vang a ni a, mahse, mi a ni leng kan ni lo. Quarterfinal-a kan hmachhawn tur kan thlir phawt ang a, tupawh hmachhawn dawn ila a harsa ang tih ka hria," a ti. 

Premier League-ah match ruk zet chu a zawnin Anfield-ah Reds an tlawm tawh a, Klopp chuan English football-a an chet ṭhat chu Champions League-a an dinhmun tur hriltu tur a nih thu a sawi. 

Klopp chuan, "Team hmachhawn hautak em em kan ni a, chhuan viau tur erawh a ni lo. Kan beiseina avanga mi sawi tur siam ka tum lo. 

"Premier League-ah beisei kan phak rih lo a, mahse, insiamrem turin game kan ngah tawk. Tualchhung football-a kan chet ṭhat hian Champions League thlengin min pui thei dawn a ni," tiin a sawi. 

German coach chuan Fabinho fak zuiin, "Kan khelhtir zelna tur chu kan ngaihtuah ang. Mahse, number six hi a position dik tak chu a ni a, he hmunah hian khel 

* Jurgen Klopp-a hnuaia Reds-in European competition-a knockout match (two-legged) 13 an khelh aṭangin 12-ah an tlang a, an tlang loh awmchhun hi season hmasa Champions League last 16-a Atletico Madrid an ngam loh kha a ni. 

* April 2002 khan Reds hian Bayer Leverkusen chu 4-2 in an ngam lo a, hemi hnua German club an hmachhawn 12-ah an tlawm lo vek - vawi kua an chak a, vawi thum an draw. 

* RB Leipzig hi European competition match-a a zawna vawi hnih an tlawm vawi hnihna chauh a ni a, Champions League bikah chuan a vawi khatna a ni. 

* Liverpool hian 2008-09 season khan goal chhuah loin Real Madrid chu Champions League last 16 aṭangin an pet chhuak a, hemi hnua last 16 double leg-a goal chhuah loa an tlang leh hmasak ber a ni. 

* Leipzig hian Liverpool hma hian English club Tottenham Hotspur leh Manchester United chu vawi hnih ve ve an hmachhawn a, vawi thum chakin vawi khat an tlawm - Liverpool lakah erawh an tlawm ve ve. 

* Mohamed Salah-a'n tun season inelna hrang hrangah match 39 khela goal 25 khungin assist vawi li a nei a, Premier League player zingah tun season-a ani aia inelna hrang hranga goal khung hnem an awm lo. 

* September 2017 khan Alisson-a'n Liverpool tana a Champions League match hmasa ber a khel a, hemi hnuah hian European club football inelna sang berah ani aia clean sheet (16) nei ngah an awm lo.