Ramhlun Venglai an chak

Mahuma Memorial 1st Division Screening Tournament khelh laiah nimin khan Ramhlun Venglai chuan Gorkha lakah run 14 in hnehna an chang - RVL hian an match hnihna atan March 16, Thawhlehniah Zemabawk Pitchers an hmachhawn leh ang.

Suaka Cricket Ground, Sihhmuia inkhelah Ramhlun Venglai hi ṭhum vawra vannei zawk niin vuak hmasak an thlang. Beisei angin run an siam hnem lo, over 38.3 chhunga run 148 siamin an thi kim.

Player of the match atana thlan tak Joseph Lalthankhuma'n ball 77 aṭangin run 55 a siam a, captain Remruatdika Ralte-in run 34 a siam bawk - player dangin run an siam hnem loh avangin target sang tak an siam lo.

Amaherawhchu, Gorkha lamin Ramhlun ball vawm thiamte an ngam lo. Joseph Lalthankhuma'n over 8.5 a vawm aṭangin wicket ruk ngawt a la a, ani bakah hian Lalrinfela Zadeng (2 wickets), Remruatdika Ralte (1) leh V.L. Remruatpuia (1) te an che ṭha.

Gorkha hian over 31.5 chhunga run 134 chauh siamin an thi kim. Anni hian an match hnihna atan Match 18, Ninganiah Chhinga Veng an hmachhawn leh ang.

Nimin khan Durtlang khelmual lamah Khaled Memorial 2nd Division Screening Tournament khelh a ni bawk a. G. Lalbiakvela chuan Luangmual tan wicket nga la mah se a team a chakpui zo lo, Legens lakah Luangmual hi run 48 in an tlawm.

Armed Veng    09:30 AM    Chhinga Veng

Ramhlun Venglai    bt    Gorkha

(Ramhlun Venglai hi run 14-in an chak)

PoM: Joseph Lalthankhuma (Ramhlun Venglai)

Tlangnuam    09:30 AM    Hunthar

Legends    bt    Luangmual

(Legends hi run 48-in an chak)

PoM: Pradeep Kumar (Legends)