Remontada 2.0 a thleng ta lo! PSG-in Barcelona an pet chhuak

Kum 2017 khan Barcelona-in Champions League last 16 first leg-a 4-0 ngawta an hneh loh Paris St-Germain chu Nou Camp-ah 6-1 in an lehthal a, khawvel football inkhela inlehthalna ropui ber zinga mi a ni. 

Kum li hnuah PSG-in Nou Camp an tlawh leh a, French champion hi last 16 first leg-ah 4-1 in an hneh. Barcelona-in infuih nan kum 2017-a thil thleng an hmang a, Parc des Princes-ah thilmak thlen nawntir an tum.

Amaherawhchu PSG an chesual nawn lo. Kylian Mbappe hmangin goal an khung hmasa a, Barcelona-in Lionel Messi hmangin siphurh sut mah se goal dang an khung belh lo. Argentine forward hian penalty a hlah a, aggregate-ah PSG 5-2 in an chak. 

Tun season Champions League-ah Messi hmuh tur a awm tawh dawn lo a, amah ang bawka player ropui Cristiano Ronaldo te pawh FC Porto hneh loin an tla tawh bawk. 2004-05 season hnua a vawi khat nan Ronaldo emaw Messi emaw Champions League quarterfinal-ah an inlan dawn lo. Engkim tan hian hun ruat a awm a, Messi leh Ronaldo te pawhin an hun tawp lam an hmang ta.

Mizo ṭawnga inlehthal tih hi Spanish ṭawng chuan 'remontada' a ni a, kum 2017-a Barca-in PSG an lehthal kha 'remontada' tih a ni. PSG-in Nou Camp an luhchhuah khan second leg tih ngaihnawm nan 'Remontada 2.0' tih thupuia hmangin Barcelona tan beisei tur a la awmah an ngai.

Amaherawhchu kum li kal ta kha chuan Nou Camp-ah second leg khelh a ni a, player chauh ni loin mipui pawh an inpeih. Tunah erawh second leg hi Parc des Princes khelh a ni a, Covid-19 vangin mipui puihna a awm thei lo. Mipui pawh awm ta teh reng se, PSG chu dinhmun ṭha zawk tur an ni.

Chutihrualin Barca-in inkhel bul an ṭan ṭha a, Neymar-a tel lohna PSG an hlauthawng. Mauricio Pochettino hoten goal venghim tura tlarhnunga inremphui an hreh lo a, ball chang tam Barca tan Ousmane Dembele-a'n chance ṭha a hlah hnem hle.

Catalan club in hnehna chang turin goal li tal an mamawh a, PSG-in goal venhim hna an thawh ve tlat avangin Messi, Dembele leh Antoine Griezmann ten goal khung an harsat. Barca 'comeback' tumna aiin PSG-in Spanish club chelh an tumna a hlawhtling zawk.

First leg-ah Mbappe-a'n hattrick a siam a, French forward hi Messi leh Ronaldo te chawlh hun pawha an hmunruak hnawh khat thei tur zinga ngaih a ni. Champions League-a Messi leh Ronaldo te record tluk pha turin Mbappe-a'n hun la duh mah se FIFA World Cup nomawi chawi tawh a ni a, dah hniam theih a ni lo.

Parc des Princes-ah pawh hian Clement Lenglet laka Mauro Icardi-a penalty hlawhchhuah chu Mbappe-a'n minute 31-naah goal-ah a chantir a, PSG dinhmun ṭha tawh sa a ṭhat belh. Amaherawhchu Messi dah ṭhat reng theih a ni lo a, Barcelona jersey number 10 hatu hian 25 metres aṭangin kawh zetin goal kilah a pet lut.

Messi goal ropui hian Barcelona beiseina a siam a, an phur thar phah hle. PSG defender Layvin Kurzawa-a'n ṭul lo takin box chhungah Antoine Griezmann a ti tlu a, first half injury time-ah penalty a chawi. Messi a rawn pen chhuak a, PSG keeper Keylor Navas-a'n dansak.

Kum li liam taa 'remontada' thlentirtu zinga player pawimawh Messi chu 'remontada 2.0' ti tlawlhtu zingah a tel ta zawk. Barca beiseina a tla hniam a, PSG keeper Navas che ṭha chhunzawm nen second half-ah goal hmuh tur a awm tawh lo.

PSG-in second half-ah goal an chhuah tawh lo a, defender Marquinhos-a'n halftime-a Mauricio Pochettino thusawi chu hun chanve hnu lama an chet ṭhat chhan a nih thu a sawi.

Argentine manager hian Tottenham Hotspur a siam lian a, hlawhtling viau mah se nomawi a chawipui loh avangin coach ropui zinga chhiar tel a har. PSG a enkawl hnuah Trophee des

Champions a champion nghal a, Champions League leh Ligue 1 nomawi a chawi thei a nih chuan sawisel theih a ni tawh lo ang.

PSG manager Pchettino chuan, "First half-ah khan kan ngaihtuahna kan seng nasa lutuk a, tlak leh palh kan hlau. Ball pass dan turah kan buai a, kan rilru kha a mangang a ni. Second half-ah erawh team dang daih kan ni a, huaisen takin kan khel chhuak," tiin inkhel chungchang a sawi.

Barcelona-in kum 14 chunga a vawi khat nan quarterfinal an thleng zo lo. PSG an hneh loh zawhah manager Ronald Koeman-a'n Catalan club-in hmabak êng tak an neih thu sawi mah se Barcelona leh Lionel Messi ten chuai lam panah a ngaih theih.

Catalan club hian kum 2016 khan Atletico Madrid hneh loin an tla a, kum 2017-ah player upa tamna Juventus an hneh lo. Kum 2018 leh 2019-ah mualpho takin AS Roma leh Liverpool an inlehthaltir a, kum 2020 khan 8-2 tehmeuhin Bayern Munich an hneh lo.

Tun ṭumah pawh Barca hian farmers league tiha sawi ṭhin Ligue 1 club PSG lakah 5-2 ngawtin an tlawm. An thiampuipa Messi-a'n kum 33 a tling tawh a, club nen intih thiam lohna an nei bawk nen team boruak a chhiat phah. Season tawp rualin Messi contract a zo dawn a, Argentine forward hian a pawtsei lo a nih chuan PSG laka an chak loh ṭum hi Barcelona jersey ha chunga Champions League-a a inlan hnuhnung ber a ni thei ang.

Chutihrualin Barcelona inthlana president atana Joan Laporta a tlin avangin Catalan club boruak a tih ṭha turah an ngai. Spanish club hian Copa del Rey final an lut a, Athletic Bilbao nen final an khel dawn. La Liga-ah bul ṭan ṭha lo mah se pahnihnaah an awm a, champion beiseina a la thamral lo.