Hnehna nen Federer a lo kir

Roger Federer-a'n hliam vanga hun rei tak tennis a khelh theih loh hnuah a lo kir leh ta a, world number 1 hlui hian Qatar Open khelh laiah Dan Evans hnehin ṭha takin a inkhel leh thei tawh.

Centre Court a inkhelah Federer hian 7-6, 2-6, 7-5 in hnehna a chang, darkar hnih leh minute 24 an inkhelh chhungin Federer-a'n harsatna lian tham a nei lo, nuamsa takin court chhungah a che vel thei a ni.

Grand Slam vawi 20 chamnpion tawh Federer chuan, "Ka chak emaw chak lo emaw pawh ni se tennis khelh leh theih hi a nuam, hlimna leh lawmna tur hlir a ni. Engkim mai hi a ṭha zawngin a kal leh thei turah ka ngai," tiin beisei a nei sang hle.

Kum 39 mi Federer hi hliam leh hrileng vangin kum khat leh thla hnih zet a inkhel lo, a khup hliam vawi hnih zai tawh niin ngai a awh leh theih beiseina pawh a hniam hman, tunah erawh a eng zawngin thil a thlir leh thei tawh ang.

Australian Open-ah khan Federer hian inlan a tum a, mahse atan a hma lutuk nia ngaiin a inhnukdawk. Tunah chuan French Open leh Wimbledon khelh tumin a intuaihriam chho zel tawh dawn a ni.

Federer a inkhelh theih lai hian a elpui lian ber Rafael Nadal erawh hnungzâng na vangin a la inkhel thei lo. Spanish tlangval hi Australian Open khelh dawn khan a inhliam - Melbourne khawpuiah inkhel lui mah se a hnu lamah erawh a inkhel thei ta rih lo.

Kum 34 mi Nadal chuan, "Dubai Tennis Federation hian duhsak takin wildcard min pe, mahse vanduai thlak takin hliam vangin ka ti hlawhtling thei ta lo. Tournament tluang taka nei turin duhsakna ka hlan," a ti.

March 24 aṭanga April 4 chhung hian Miami Open khelh a ni dawn a, a hliam a dam hman a nih chuan Nadal hian inlan ngei a tum a ni.