Rooney-a'n United hmachhawn dawn

Wayne Rooney-a'n zanin dar 1:15 hian sulhnu ṭha tak a hnutchhiahna Manchester United chu Derby County kawr hain Pride Park Stadium-ah a hmachhawn ang.

Kum 34 mi Rooney hian August 6, 2019 khan Derby County nen January 2020-a Championship club zawm turin inremna an siam. English forward hian Rams tan captain armband a hreng nghal a, khelmualah che ṭha bawkin hming a chher hle.

Derby County-in Old Trafford an luh theih nan Wayne Rooney a ṭangkai hle. January 5 khan Derby-in FA Cup third round-ah Premier League club Crystal Palace 1-0 in an hneh a, Rooney hian deep-lying midfield hna chelhin a khel ṭha hle.

Fourth Round-ah Derby-in harsatna tawk loin League Two club Northampton Town FC chu 4-2 in an sawp a, Rooney pawhin goal a khung. Hnehna an chan ṭum hian entu 33,597 lenna Pride Park Stadium-ah entu 15,860 chauh an pungkhawm a, Manchester United nen entu ṭhahnem zawk an kal khawm dawn.

Championship lamah erawh Derby an che ṭha tawk lo. Rooney awm hma hian league-ah match 25 khelin vawi sarih chakin chak loh leh inhnehtawk vawi kua ve ve an nei a, an result a ṭha lo. Derby hian Rooney awm hnuah hma an sawn a, match 11 khelin vawi ruk an chak a, inhnehtawk leh chak loh vawi thum ve ve an nei.

Rams hi league-ah point 48 hmuin 13-naah an awm mek a, United nen an inkarah club 27 zet an awm avangin Ole Gunnar Solskjaer hote rinkai zawk tur an ni. Amaherawhchu FA Cup fifth round aṭangin replay a awm lo a, Pride Park Stadium-a khelh tur a nih bakah Rams-in Rooney an neih tawh avangin eng result pawh thleng thei a ni.

Wayne Rooney hi England national team leh Manchester United tana goal khung tam ber record chelhtu a ni a, United hi match 559-ah goal 253 a khungsak. Rooney chuan, "United nen Premier League leh Champions League nomawi kan chawi a, hun ropui tak kan tawng. Ka hun tawn tawhte ka thlir kir ṭhin a, ka ngai hlu ṭhin hle. United hi ka hmangaih a, amaherawhchu tun ṭumah erawh chak lo se ka ti. Minute 90 emaw 120 kan khel dawn a, chak theih dan kawng a awm," tiin a club hlui hmangaih mah se Derby chakpui a tum thu a sawi.

Premier League goalkeeper langsar zinga tel pha ṭhin Shay Given chuan Rooney-a'n goal a khung phawt chuan a lawm ngei a rin thu a sawi a, Derby tana penalty leh freekick a pet miau avangin khung thei dinhmunah a ding. Rooney hian Championship club tan hian match 14 a inlan tawh a, goal li a khung bakah assist vawi hnih a nei tawh a ni.

Derby County manager Phillip Cocu pawhin, "Wayne hi kan tan a pawimawh a, Manchester United hi midang zawng aiin a hrechiang zawk. He club hneh tura kan thil mamawh chu amahin a hre ber a, match dangah pawh amah hi ka rawn ṭhin a, United nen a pawimawh lehzual ang," tiin a sawi a, Rams-ah hian Wayne Rooney hi captain a nih bakah coach a ni tel bawk.

Manchester United-in match hmasa berah Wolverhampton Wanderers nen replay an khel a, Old Trafford-ah 1-0 in an hneh hram. Fourth round-ah erawh harsatna an tawk lo a, United-in Tranmere 6-0 ngawtin an sawp.

Solskjaer hote hian an match hnuhnung berah Everton an draw ṭawk a, amaherawhchu an player thar Bruno Fernandes avangin an phur thar hle. Portuguese midfielder hian United tan match ruk khel tawhin goal thum a khung tling der tawh a, goal a khung ai maha pawimawh zawk erawh United game timawitu a nihna hi a ni.

Fernandes hian game 'tempo' thlak danglamin United-in game hmuhnawm zawk an khel leh tawh a, inhliam vanga hun rei tak khel tawh lo Paul Pogba chelh duhtu aiin hralh duhtu an tam phah bawk. Chutihrualin United hian Pathianni zan dar 10:00-ah Manchester City an mikhual dawn a, Solskjaer-a'n Fernandes hi hahdamna hun a pek a rinawm zawk. Premier League club hian player ṭha dang erawh an chhawr a rinawm a, Marcus Rashford a la inhliam bakah Anthony Martial dinhmun a la chian loh avangin January-a lakluh Odion Ighalo pawh bul ṭan thei dinhmunah a ding.