Dhoni leh Kohli telna India team an ṭha

Mahendra Singh Dhoni-a'n sawisel tawk ṭhin mah se India-in Old Trafford Cricket Ground-ah West Indies an hneh theih nan a hunah tak a rah. Kum 37 mi Dhoni hi Men in Blue tikimtu ni loin player pawimawh a la ni reng a, man of the match-a thlan captain Virat Kohli pawh team hruaitu a ni tih a chiang e.

Ningani inkhelah India-in West Indies chu run 125 zeta sawpin semifinal an hnaih zel a, Windies erawhin point an hlawhchhuah zawh loh avangin an tla. Virat Kohli hote hian Pathianni tlai dar 3:00 hian Edgbaston Cricket Ground-ah inelna thlengtu England an hmachhawn dawn.

Ṭhumvawra chak Virat Kohli-a'n bat hmasak a thlang. India-in Pakistan an hneh ṭuma run 140 zet siamtu Rohit Sharma a la che ṭha leh lo a, Afghanistan laka run khat a siam hnuah Windies lakah pawh run 18 chauh a siam.

Shikhar Dhawan thlaktu KL Rahul pawh vul chuk loin a rintlak zel a, run 48 a siam. Virat Kohli pawhin run 72 siamin India tana run siam hnem ber a ni a, amaherawhchu Vijay Shankar (14 runs) leh Kedar Jadhav (7) te an chet ṭhat loh avangin Men in Blue dinhmun a ṭha lo.

MS Dhoni rawn inlanin eng ruai a ang lo a, ṭum danga an sawisel ang thoin ball a hmachhawn tam huin run a siam tlem. Amaherawhchu wicketkeeper Shai Hope-a'n 'stump out' theihna remchang a pumpelh avangin Dhoni-a'n insiamṭhatna hun a nei a, over tawp lamah tun hmaa Dhoni kha rawn inlarin India dinhmun ṭhaah a dah.

India captain hlui Dhoni hian over tawp berah six vawi hnih leh four vawi khat vaw chhuakin run 56 a siam. Hardik Pandya-a'n run 46 siam ve bawkin Men in Blue-in over 50-ah run 268/7 an siam a, chak turin an dinhmun a ṭha. Dhoni hian wicketkeeping-ah pawh a theihna pholangin Carlos Brathwaite thih theih nan dive chungin kut khingkhatin ball a man.

India-in Jasprit Bumrah an kawl a, Afghanistan laka hattrick siamtu Mohammed Shami chu Bhuvneshwar Kumar aiin thlan chhunzawm a ni bawk. Indian pace bowler-te'n West Indies batsman-te an chhaih buai nghal a, Bumrah hian over rukah run li chauh pein wicket hnih a la a, hattrick siamna hun ṭha a bawhpelh bawk. Shami-a'n over 6.2-ah wicket li lain run 16 chauh a pe. Bowler dang Yuzvendra Chahal (wicket hnih), Hardik Pandya (1) leh Kuldeep Yadav (1) te pawh Windies batsman ten an chai thei lo.

West Indies batsman zinga run siam tam ber Sunil Ambris-a'n run 31 chauh a siam a, team pumpui hian over 34.2-ah run 143  chauh siamin an thi vek.

India captain Virat Kohli chuan, "MS Dhoni hian cricket kalhmang a hrechiang. Thil awm dan a chhut thiamna hi a ṭhatna tak a ni a, chak dan hi a hrechiang a, he game-ah hi chuan legend a ni," tiin a fak hle.

West Indies captain Jason Holder chuan, "Tun inelnaa kan chet chhiat chhan chu kan thiam loh a ni. Bowling department lam chu an khel ṭha a, batsman-te erawh khelh ṭhat ṭum aiin khelh chhiat ṭum kan ngah zawk a, batting-a kan chet chhiat vangin tun dinhmun hi kan thleng," tiin an tlak chhan a sawifiah.