Barca-ah Neymar kir a duh

Spanish champion Barcelona vice president Jordi Cardoner chuan an player hlui Neymar chuan Paris St-Germain chhuahsana, an hnena kir a duh niin a sawi. 

Brazil international hian kum 2017 khan PSG hi khawvela footballer manto ber ni turin pound maktaduai 200-in a zawm a, match 58 a khelh sakah goal 51 khung sak tawh mah se Paris-ah a rilru a nghet tak tak thei lo niin khawthlang media-te chuan an tarlang. 

Cardoner chuan, "Ka ngaihdanah chuan Neymar hian Barca-a rawn kir ngei a duh a, mahse Nou Camp-a lalet tura indawrna awm anga sawi erawh ka pawm zawng a ni lo," a ti a, inbiakna an neih loh thu a sawi. Spanish media-te chuan Neymar hian Barcelona a pan theihnan kum khata euro maktaduai 12-a a hlawh tih hniam a remti niin an tarlang hial a, Cardoner erawhin indawrna an kalpui loh thu a sawi thung.

Barcelona hi Atletico Madrid aṭanga Antoine Griezmann lalut tura beisei an ni a, Ajax midfielder Frenkie de Jong chu euro maktaduai 75-in an la fel tawh bawk. Valencia lama goalkeeper Jasper Cillessen an chhuahtir hnuah Valencia keeper Neto an lei ve leh thung bawk a, Brazilian keeper hi kum li chhung atan contract an ziahpui. 

Season hman zawh takah Valencia tana inelna hrang hranga match 47 kheltu hi kum 29 mi a ni a, Barca hian a man atan pound maktaduai 23.3 an seng a, a khelh ṭhat dan a zirin pound maktaduai riat vel an pek belh bawk ang.