Halep hnehin Kerber a tlang

Angelique Kerber chuan Simona Halep chu straight set a hnehin Eastbourne International-ah semifinal a in vaw kai a, German nula hian final lut tur chuan Ons Jabeur a paltlang leh a ngai dawn a ni.

Ningani zan inkhelah world number 5 Kerber hian darkar khat leh minute 13 chhungin Romanian nula Halep hi 6-4, 6-3 in a hneh. Kerber a khel ṭha a, a service vawi hnih hloh ve bawk mah se break point vawi sarih a hmuh zinga panga a chhawr ṭangkai theih avangin harsa lutuk loin a tlang.

Grand Slam vawi thum champion tawh Kerber-i'n Eastbourne International-ah hian final vawi hnih a khel tawh a, amaherawhchu a chak lo zawkah a ṭang ve ve. Kuminah hian grass court inelna lian Wimbledon inbuatsaihna duhthusama nei turin nomawi chawi ngei a tum ruh hle.

Kum 31 mi Kerber chuan, "Ka khelh danah ka lungawi khawp mai. Simona nen kan intawng a nih chuan tennis game hmuhnawm leh ṭha tak khelh chhuah a ngai tih ka hria, chutiang tur chuan ka khel chhuak thei a ni," tiin a sawi.

Seeded chang phak lo, semifinal-a Kerber hmachhawn tur Jabeu-i hian inelna tir lamah a kerek hliam vangin buaina tenau nei mah se a dam fel tawh a, quarterfinal-ah France nula Alize Cornet chu 1-6, 7-5, 6-3 in a hneh.

Quarterfinal inkhel dangah seeded pahnihna Karolina Pliskova chuan Ekaterina Alexandrova 6-2, 6-0 in a hneh, 2017 champion hian Kiki Bertens a hmachhawn ve leh thung ang. Seeded pathumna Bertens hian season hmasa pahnihna Aryna Sabalenka chu 6-4, 3-6, 6-4 in a lo hneh ve bawk a ni.

World number 1 hlui Pliskova chuan, "Set hloh miah loin match thum ka kal tluang ta a, match tin maiah hmasawnna ka neih belh zel bawk avangin a nuam ka ti hle," tiin nomawi chawi a beisei ngam.