Benitez thlak thei zingah Vieira

Newcastle United chuan season thara an manager tur chiang taka biak an la nei lo a, tun thla tawp ruala chhuak tur Rafael Benitez thlak tur hming inrinsiak hunlai a ni.

Premier League club Magpies enkawl tur zinga sawi lansarh chu Patrick Vieira a ni. Arsenal captain hlui bakah hian Steven Gerrard leh Mikel Arteta te hming pawh lamrik a ni bawk. Kum 59 mi Benitez hian season thum chhung hun a hman tawhna St James' Park chu June 30 hian a chhuahsan dawn a, Spanish manager hi club leh fans lamin chelh duh viau mah se inremna an neih mai theih loh avangin a contract hi a pawtsei lo.

Liverpool manager hlui Benitez thlak thei tura an sawi Vieira hi kum 43 mi chauh a la ni a, season hmasa khan European club a enkawlna hmasa ber ni turin Nice a kaihruai a, an ram club hi French Ligue 1-ah pasarihna a nihpui. 

France captain hlui hi Nice-ah a hlim tawk nia sawi a awm a, club lian zawk enkawl a hmanhmawh loh thu pawh a sawi tawh. Mahse, 2015-a Newcastle-in Steve McClaren an lak hmaa an lo biak tawh Vieira sawi zawm a ni leh hi a mak lo a, club lamin an dawr a nih chuan a ngaihchan tur thu a sawi lang.

Magpies nen an inbiak hmasak lai kha chuan Manchester City-ah player naupang zawk kaihhruai hna a thawh lai a ni a, a hnu lamah MLS club New York City enkawlin season thum hnuah Nice a pan leh tawh zawk a ni.