Africa Cup of Nations Senegal ngamtu Algeria an kal zel

Africa Cup of Nations-a group stage match nghahhlelhawmah Ni­ngani zan khan Algeria chuan 1-0 in Senegal an hneh a, last 16 an lut. 

Senegal-in match sarih zet a zawna hnehna an lo chan tawh chu tihtawp sak an ni a, Africa khaw­mualpuia world ranking-a sang ber (22-na) team hian last 16 lut tur chuan match hnuhnung bera Kenya an hmachhawn hun an nghah leh phawt a ngai dawn tihna a ni. 

Kenya hian match hmasa berah Algeria ngam lo ve tawh mah se 3-2 in Tanzania an hneh a, last 16 luh beiseina an la nei - Tanzania erawh match khat khelh tur la nei mah se beisei tur an nei tawh lo. Madagascar-in AFCON-a an chak hmasak ber tawng turin Burundi chu 1-0 in an hneh a, match hmasa berah Guinea an inhnehtawkpui tawh avangin knockout round lut turin an dinhmun a ṭha ta hle. 

Inkhel chu 

AFCON group stage match zinga ngaihven hlawh ber pawl ni mah se Senegal leh Algeria inkhelin beisei a phak lo a, first half-ah goal lut loin hun an khar. 

Second half minute linaah Algeria lamin goal an khung a, Galatasaray midfielder Sofiane Feghouli ball siamsak chu Youcef Belaili chuan Algeria goal awmchhun ni turin a khung. Algeria-in goal an khung hnuah pawh game a nung meuh lo a, mipuiin an beisei inkhel an hmu lo. Senegal hian minute 78-naah target zawna shot an nei ve chauh!

Yard 20 vel aṭanga Youssouf Sabaly shot chu Algeria goal­keeper Rais M'Bolhi chuan a lo dang per a, a per lehlam hi Senegal forward Mbaye Diagne chuan hnai zet aṭangin a pet out. 

Team langsar Senegal leh Algeria intawng tur hi an intawn hma hauhin sawi 'hot' a hlawh a, Manchester City winger Riyad Mahrez leh Liverpool forward Sadio Mane 'indona' ang hialin an chhuah. 

Mahse, Ningani zana team pahnih intawn ṭumin player pahnih an langsar lo ve ve a, sawi zui tur an nei tlem dun hle. Senegal-in goal an chhuah hnuah Mane-a'n chance a rawn nei ve zawk a, mahse Liverpool forward hian hnai set sawt aṭangin a tauh over.

Mane hi a vanduai tia sawi theih a ni bawk - hun tawp nan minute 20 chauh a awm tawh tihah penalty hlawh chhuak ngei tura ngaih a ni a, mahse referee-in a ham tlat lo. AFCON-ah hian quarterfinal aṭang bakin video assistant refe­ree (VAR) hman a ni dawn lo. 

Mahrez-a'n chance duhawm nei lo tawp erawh a ni bik lo. Amaherawhchu, Mane hming hliahkhuh turin a theihna a pholang thei bik lo a, a chance neihchhun hi a pet out. 

Tanzania-in vawi hnih ngawt hma an hruai hnuah Kenya-in an si phurh an sut zel a, hun a tawp meuh chuan 3-2 a chak zawk an ni - Tanzania tan AFCON mangṭha a ṭul phah. 

Simon Msuva leh Mbwana Samatta hmangin Tanzania hian vawi hnih ngawt hma an hruai a, mahse Michael Olunga leh Johanna Omolo hmangin Kenya hian an si phurh an sut ve ve. Hun tawp nan minute 10 chauh a awm tawh a, team pahnihin point an insem mai dawn niin a lang hman - mahse Olunga bawk a inlar. 

Japanese club Kashiwa Reysol forward hian an goal thumna a rawn khung a, Tanzania tan si phurh sutna hun a awm tawh lo. Kenya-in 3-2 in hnehna an chang a, last 16 luh beiseina an chhi nung zel. 

Madagascar-in an ram chan­china AFCON an khelh hmasak berah last 16 lut turin kawng dik an zawh zel a, match hnih an khelhah point li an nei ta - an group-ah pahnihna an ni pha lo a nih pawhin pathumna nichunga last 16 lut turin an dinhmun a ṭha tawh. 

France Under 20 international hlui Marco Ilaimaharitra chuan minute 76-naah freekick hmangin Madagascar tan goal a khung a, Burundi lamin an chhanlet theih loh avangin 1-0 in an chak. Madagascar hian chance duh­awm vawi tam an nei a, Carolus Andriamahitsinoro free kick leh shot ṭha tak chu Burundi keeper Jonathan Nahimana chuan ṭha zetin a dan sak a, goal ngei tura ngaih chu line aṭangin an pet chhuak hman bawk. 

Burundi chance neih ṭhat bera chhal theih chu Enock Sabumukama chuan holam takin a chhuah a, an chhuanvawr Saido Berahino-a'n beisei a phak lo a, Stoke City striker hi minute 61-naah lakchhuah a ni.