Bayern-in German Cup semifinal lut

Bayern Munich-in Thawhlehni zan khan Schalke 1-0 in an hneh a, DFB Pokal-ah kum 11 chhung a zawnin semifinal an lut. Bavarians hian inkhel thunun mah se minute 40-naa Joshua Kimmich goal khung bakah goal dang an khung belh thei lo.

Inkhel dangah fourth tier club Saarbrucken chuan Bundesliga club Fortuna Dusseldorf barakhaihin semifinal an lut. Saarbrucken leh Dusseldorf hi hun pangngaiah 1-1 in an inhnehtawk a, penalty shootout-ah south west regional league khel mek Saarbrucken hi 7-6 in an vannei.

Veltins Arena-ah entu 62,271 an pung khawm a, Bayern-in inkhel thununin ball an chang tam hle. Amaherawhchu mualneitu Schalke-in chance an nei hmasa zawk a, Guido Burgstaller-a'n crossbar a pet per. Bavarians an talbuai lo a, minute 40-naah Joshua Kimmich chuan goal awmchhun a khung. Hansi Flick-a'n goal khung khawl Robert Lewandowski awm loh an tuar a, inkhel thunun chungin goal dang an khung 

belh lo.

Bayern Munich hian German Cup semifinal an luh takah chuan treble champion beiseina an nei chhunzawm zel. Bavarians hi Bundesliga-ah hmahruaitu niin anmahni hnaih bertu RB Leipzig aaiin point thumin an hmu tam zawk a, Champions League-ah last 16 lutin first leg-ah Chelsea 3-0 in an hneh bawk.

Quarterfinal pakhat zawkah Saarbrucken tan keeper Daniel Batz chu hero a ni a, hun pangngaiah penalty vawi khat dangin penalty shootout-ah vawi li dang a dang leh. Fourth tier club Saarbrucken-in Bundesliga club Fortuna Dusseldorf an hnehna kawngah a che ṭha fal hle.