James awmna Lakers ropui zel

LeBron James leh Anthony Davis te double double neih hmangin Los Angeles Lakers chuan Philadelphia 76ers 120-107 in an hneh a, NBA regular season kal laiah Western Conference table hmahruaitu an nih chhunzawm.

Nimin zing inkhelah Lakers tan James-a'n point 22 leh assist vawi 14 a nei a, player ṭha dang Davis-a'n point 37 a neih bakah rebounds vawi 13 lain hnehna an chan theih nan an thawhhlawk leh hle.

Beisei phak lo Golden State Warriors chuan a vawi 14 nan chak ni hmel an hmu ve leh ta, coach Steve Kerr kaihhruai Warriors hian Denver Nuggets 116-100 in an hneh. Golden State hian chanchin lawmawm dang an nei, an thiampuipa Stephen Curry chu a dam tawh a, a inlan thei dawn hnai. Zirtawpni zinga Toronto Raptors nen an inkhelh hunah chuan a inlan theih a beiseiawm. GSW coach Kerr chuan, "Thil engkim a kaltluang a, inkhel turin a inpeih leh tawh e," a ti. NBA MVP vawi hnih ni tawh hi nikum October thla khan a ban ruh a tliak a, a inkhelh theih loh chhungin a team an che chhe hle.