Chanmari West chak ve ta

Suzuki Gixxer Pro Volleyball League 2019-ah team thar Chanmari West chuan a vawi khat nan hnehna an chang ve ta. Thawhṭanni zan khan Chanmari West hian Thutak Nunpuitu Team (TNT) chu 17-15, 16-14, 9-15, 17-15, 15-10 (4-1) in an hneh.

Chawnpui Sports Centre-a inkhelah TNT hian a tir lamah khel ṭhain a khingpui chai tawk viau mah se hun pawimawh lai takah point an hloh ṭhin a, set la turin an vannei tawk lo. Abhimanyu Ray chuan Chanmari West tan point 26 ngawt thawk chhuakin a vawi khat nan RS Traders Player of the Night atan thlan a ni a, a team a chak pui bawk.

Set hnih an hloh hnuah TNT lamin VL Sangluaia Sailo an dah lut a, ani hian Muanna Veng team tan boruak rawn siam danglamin set thumna bikah 12-9 a hmahruaiin set an la tlang - a zawna match hnih tlawm tawh TNT lamin beiseina nung an nei thar.

Mahse, set hnuhnung pahnihah erawh fal taka kal thei an awm lo, team huaisen zawk Chanmari West lam tan 15-15 a nih laiin Railways player Abhimanyu chuan point thum rawn nei zawnin a club hi dinhmun duhawmah a dah a, a tawp thlengin an hawikir tawh lo.

Match thum an khelh tawha chak ni hmel la hmu lo TNT ten semifinal beiseina a chau tawh a, zanin hian Tuichangral nen an inhmachhawn zui leh nghal ang. Chanmari West erawhin hnehna an chan bakah set khat chauh an hloh avangin a sang pali zinga tel theihna kawng a inhawng zau leh a, Ningani zanah Anastasia Electric Veng nen an inhmachhawn leh dawn a ni.

Chanmari West bt TNT

17-15, 16-14, 9-15, 17-15, 15-10 (4-1)

RS Traders Player of the Night: Abhimanyu Ray, Chanmari West

Junior Team

TNT bt Chanmari West

16-14, 15-5, 15-9, 15-9, 15-9 (5-0)

Tuichangral 6:00 PM TNT

senior Team

Tuichangral 8:00 PM TNT