New Zealand lamah Saina Nehwal

India nula badminton khel thiam Saina Nehwal chuan tun season chhunga a nomawi pahnihna tur a zawng mek a, tun kar chhunga khelh tur New Zealand Open-ah a inlan ang.

Kar hmasa khan Saina hi Asia Badminton Championships-ah a inlan a, a tir lamah khel ṭha viau mah se quarterfinal a paltlang zo lo. New Zealand-a a match hmasa berah hian Chinese nula Wang Zhiyi nen an inhmachhawn dawn a ni.

London Olympic bronze medalist Saina-i'n kuminah Indonesia Masters title a la tawh a, Indian shuttler zingah season hmang ṭha ber anga ngaih theih a la ni. Tun inelna bikah hian Rio Olympic silver medalist PV Sindhu chu a inlan dawn lo.

Mipa singles lamah B Sai Praneeth, HS Prannoy leh Subhan­ker Dey te chu main draw khel nghal thei zingah an awm a, hetih lai hian Ajay Jayaram, Parupalli Kashyap leh Lakshya Sen te erawh­in qualifier an khelh a ngai.