Nou Camp inring r'u: Klopp leh a naute an lokal!

Barcelona khelmual chu Nou Camp a ni a, he khelmual hming lamrik ringawt pawh hi player tam tak tan chuan khurhna tham a ni a, knockout inelnaah ngat phei chuan Barcelona hmachhawn hi eng team tan mah ṭawngṭai chhannaa ruat chi a ni lo. 

Chu team hlauhawm leh ṭha chu Liverpool hmaah zanin dar 12:30 hian an ding dawn a, an inhmachhawnna tur hi Champions League semifinal first leg a nih miau avangin Reds fan-ten hlauhthawnna nen zanin hun an thlir a nih pawhin a mak lo ang. 

Liverpool boss Jurgen Klopp erawh a hlauthawng lo. German coach chuan, "Nou Camp hi stadium pakhat ve mai a ni. Stadium lian tak a ni a, mahse football biakbuk erawh a ni lo," tiin Barca khelmual chu ṭih tur a nih loh thu a sawi. 

Klopp hian a naute fuih phur nan Nou Camp hlauhawm loh zia a sawi a ni mai thei a, mahse khelmual chhung luhruala Lionel Messi, Luis Suarez, Philippe Coutinho, Sergio Busquets leh Ivan Rakitic te lo intlar tur mitthla hian ngaihnep luih erawh a harsa. 

Barcelona-in match thum khelh tur la nei chungin La Liga nomawi an chawi tawh a, hei tak hi Liverpool nena an dinhmun ti thlautu a ni thei. Reds hian Premier League champion an beisei ve mek a, match hnih an la bak. 

Merseyside club hian hmahruaitu Manchester City chu khelh zat inangah point khatin an phak lo mek a, champion tur hian an hmabak match hniha chak chunga City chetsual an ngaihchan tel a ṭul. Inrinni zana Newcastle United khelmuala lenglut lehnghal mai tur Liverpool-in Barca aiin ngaihtuahna senna tur an ngah zawk tihna a ni a, Ernesto Valverde-a'n venthawn nei hauh loa a naute a rem theih dawn laiin Klopp tan erawh fimkhur a ṭul tel. 

Heng zawng zawng thlir chuan Liverpool aiin Barcelona dinhmun a ṭha zawk niin a lang a, hriat tel atana ṭha erawh Liverpool hi tun season-a league match 36 an khelh tawha vawi khat chiah la tlawm an nih avangin Barca hneh turin theihna an nei. 

Barcelona-in season hmasa khan La Liga leh Copa del Rey nomawi an chawi kawp a, club tam tak tan hlawhtlinna ropui tak a nih laiin Catalan club erawh an lawm a kim lo a, an nomawi 'bawm' a ruakin an hre tlat!

Ni e, Barca hian 2015 hnuah Champions League nomawi an chawi leh tawh lo a, an hmelma kumhlun Real Madrid erawhin a zawnin kum thum European club ṭha ber nihna an hauh a, Barca tan thlir a nuam lo. Season ṭantirah Messi-a'n Nou Camp khat tlata mipui pungkhawm hmaah thu a sawi a, "Ram chhungah nomawi pahnih kan chawi a, mahse a la tawk lo. Champions League kan duh a ni," a ti a, mipui thawm chu ring tak a ni. 

Tun season-ah an beisei ang ngeiin hunṭha an nei ta a, holam taka liamtir an duh dawn lo. La Liga nomawi an chawi hlim meuha Valverde thusawi pawh, "Kan zinkawng a la tawp lo," tih hi a ni a, Europe-ah roreltu nih a duh. 

Mahse, Barca beisei ang ngawtin thil a awlsam dawn lo. Reds hi tun lai khawvela football hmuhnawm ber pawl pho chhuaktu an ni a, chu inkhel hmuhnawm lantir tur chuan thluak bur ṭha ber pawl Klopp an nei a, suangtuahna a tak rama chantir turin player an nei ṭha tawk. 

Klopp chuan, "Barca hi pumpelh reng theih an ni lo a, hmachhawn hun hi chu a la thleng dawn tih a chiang a ni. Team tam tak an lo mikhual tawh a, theihnghilh daih atana an duh an tawng fo. Kan hun a inher chhuak ve ta a, ṭha taka khelh kan tum ang," a ti. 

Liverpool tan tlarhmaah Sadio Mane, Mohamed Salah leh Roberto Firmino te an pawimawh leh dawn a, an khelh ṭhat ni chuan khawvela tlarhnung khawng ber pawh ṭhiat turin an ṭha tawk. PFA Player of the Year Virgil van Dijk leh Lionel Messi intawng tur mawlh hi a nghahhlelhawm - kum 31 mi Messi hian inelna hrang hrangah match 45 khelin goal 46 a khung tawh a, VVD hi tun season-ah tu mahin an la bum lo!

Philippe Coutinho-a'n January 2018-a Barcelona a pan hma khan Mane, Salah leh Firmino nena an inkawp chu 'Fabulous Four' tia hminglem pek an ni a, an hmuhnawm ṭhin hle. 

Coutinho chhuahsan hnua 'Fab Three' tih ni ta player pathumte thiamna a bo lo ang bawkin Coutinho thiamna a bo lo a, Spain-a pan hnuah league nomawi pahnih a chawi fel ta der - Fab Three erawhin Liverpool tan nomawi an la chawi lo. 

Fab Three ten Coutinho hian duhthlanna a siam sual a ni, tih lantir turin khelhchhuah an tum ang a, Coutinho-a'n season ruk ngawt a hmanna leh amah chher liantu Reds mangṭha a tum thung ang. Liverpool tana Luis Suárez ropui ṭhin zia sawi nawn a ngai lo. Match 133-ah goal 82 khung sakin Barca a pan a, Catalan club tan pawh goal khung a ṭhulh chuang lo. Tun season-ah goal 24 a khung leh der tawh a, Liverpool lakah zahngaihna lantir a tum dawn lo.