Vawiinah MFA Cup Semifinal
CYLA Playground, Lawngtlaiah vawiin hian MFA Cup vawi 19-na semifinal chu khelh a ni dawn. Chawhma dar 11:30-ah Lunglei club Zotlang FC leh Kolasib District aiawh FC Rengkhawpui te an inkhel ang a, tlai dar 2:00-ah Aizawl club Aizawl FC Junior leh Champhai club Kahrawt FC te an inhmachhawn ang.
Tun ṭum inelnaah hian match 12 khelh a ni tawh a, goal 64 tehmeuh a lut tawhin match tina goal 5.33 lut ang a ni. Kahrawt FC player Lallawmtluanga chuan match tinah goal la khung vekin goal sarih a khung tawh a, amah hnaih bertu Aizawl FC Junior player David Lalhlansanga'n goal nga a khung bawk.
Rinkai AFC Jr
Group stage-a an khelh dan thlir chuan Aizawl FC Junior hi champion tura rinkai an ni a, amaherawhchu semifinal-ah an defender pawimawh Lalchungnunga chu hrem vangin an chhawr thei dawn lo.
Lengpui pa Rohmingthanga enkawl AFC Jr hian goal 15 an khung tawh a, goal khat chiah an la chhuah. Amaherawhchu an group-a an awmpui te hian an khingpui tur Kahrawt FC an tluk pha lo niin a lang. Champhai club hian tun inelnaah goal 13 an khung tawh a, MPL-a tawnhriat nei
ṭha Chhanrinpianga te an kawl avangin tawh an khirh dawn. Goal sarih khung tawh Lallawmtluanga bakah goal thum khung tawh Hmingchungnunga te hi ngaihthah chi an ni lo ang.
Final-ah Zotlang?
Lunglei club Zotlang FC-in MPL club Ramhlun North coach hlui F. Lalrozara hnuaiah inelna ṭha takin an hmachhawn a, goal 14 khung a, goal li chauh an chhuah avangin champion thei turin an ṭha tawk niin a ngaih theih. Semifinal thleng tur hian player paruk - M. Lalrintluanga (3), Joseph Lalvenhima (3), C. Vanlalhlua (3), HK Lalhruaitluanga (2), Laldampuia (2) leh Malsawmdawngliana (1) ten goal an khung.
Zotlang hian innghahna bik player an neih loh avangin FC Rengkhawpui tan khelh an harsa dawn. Chutihrualin Vairengte club hian an match hnuhnung berah harhtharna an chang a, Siahatla FC chu 5-1 zeta an sawp avangin en liam ngawt erawh a fuh lo ang.
Champion tawhte
Kum Champion
1999 1st Bn MAP
2000 Vaivakawn
2002 Dawrpui Vengthar
2003 1st Bn MAP
2004 FC Kulikawn leh MRP (Joint Holder)
2005 FC Kulikawn
2006 1st Bn MAP
2007 FC Kulikawn
2008 Lungei
2009 Khawzawl
2010 RCFC
2011 1st Bn MAP
2012 SYS FC
2013 Chanmari FC
2014 Champhai FC
2016 Chhinga Veng FC
2017 Bethel FC
2018 Kawrtethawveng FC