Canada lamah Wanyama a pem

Major League Soccer club Montreal Impact chuan Kenya midfielder Victor Wanyama chu Tottenham Hotspur aṭangin free transfer-in an lalut a, kum thum chhung atan contract a ziak. 

Kum 28 mi midfielder hian tun season-ah Spurs tan a khel phak mang lo a, inelna hrang hrangah match li chiah a khel. London club chuan, "Victor hi a hma hun atan duhsakna kan hlan a ni," an ti. Arsenal legend Thierry Henry chu Impact-ah hian coach a ni a, Pathianni khan tun season MLS-a an match hmasa berah New Engand Revolution chu 2-1 in an hneh.

 

Wanyama chuan, "Thierry-a'n a club tana khel tura min duh thu a rawn sawi khan ngaihtuahna sen buai ka ngai lo," a ti a, Canadian club a zawm chhanah Henry pawimawh thu a sawi. Celtic aṭanga European football hmelhriattu Wanyama hian kum 2016 khan Southampton aṭangin Spurs hi a zawm a, a season hmasa berah player pawimawh niin match 47-ah goal nga a khungsak.

 

Mahse, 2017-18 season-ah khup hliam vangin a talbuai a, ngai awh hleithei tawh loin a chhuak ta a ni. Nipui transfer lai khan Spurs chuan Club Brugge hnenah pound maktaduai 13.6-a hralh an remti a, mahse Belgian club hi a zawm hmain inbiakna hi a tlawlh leh a ni.