Mangṭha Tennis Maria Sharapova

Tennis khel thiam, a hmelṭhat leh pian nalh vanga lar zual; theihna leh thiamna a neih san baka rilru paukhauh tak Maria Sharapova chuan tennis khelh a chawlh san ta. Russian nula hi kum 32 mi chauh la ni mah se hliamin a tihbuai rei tak em avangin a inkhel zui thei dawn ta lo a ni.

Grand Slam vawi nga champion, major tournament palia champion kim thei Sharapova chuan a hliamin a rilru a lakpen reng thu sawiin, "Min hrethiam teh u, tennis ka mangṭha a ngai ta," tiin a chawlh thu a sawi.

Wimbledon 2004-ah khan Maria Sharapova a inlan a, inelna ti kimtu zingah a ngaih theih. Amaherawhchu kum 17 mi chauh ni chungin a champion! Final-a a hneh chu Serena Williams a ni a, grass court inelna lianah hian champion thei naupang pathumna a ni. Khawvelin tleirawl hmelṭha leh pian nalh Sharapova chu a tennis thiam vangin a hre ta.

Russian nula zinga world number 1 ni thei hmasa ber hian Wimbledon hnuah Serena hi vawi 20 a hmachhawn leh a, vawi khat bak a chak nawn tawh lo - an intawn hmasak bera a chak hi atan chuan hnehna hlu bera chhal theih a ni hial ang.

Sharapova hi 6ft 2in zeta sang a ni a, theihna a neih san bawk avangin a lakah beiseina a sang. Mahse, Grand Slam vawi 23 champion thei Serena leh a unaunu Venus te nen an hun tawn a inrual chho a, nomawi lian a chawi tam tawk loah a ngaih theih.

Tennis aṭangin sum a vaw chhuak hnem a, a pian nalhna leh hmelṭhatna chuan fans a hip avangin company lamin an bungrua faksak turin an duh. Sharapova hi 2010 khan Nike chuan pound maktaduai 49 man hu inremna an neihpui a, hetah hian ama thuamhnaw bik an hralhna aṭanga sum lakluh a dawn belh tur pawh a tel.

Nike leh Sharapova inremna hi hmeichhe infiammi record a ni a, thuamhnaw bakah Swiss sana manto siamtu Tag Heuer leh British car manto siamtu Land Rover bakah German car siamtu Porsche te nen inremna an nei bawk; heng hi a langsar zual chauh an ni.

Hmeichhe infiammi sum lakluh hnem lamah Sharapova hian kum 11 chhung zet chu a chungnung ber a luah. A vanglai a pelh hnu leh harsatna hrang hrangin a tlakbuak hnuah tennis lama a elpui Serena chuan sum lakluh hnem lamah a khum ve chauh.

Kum 2007 khan Sharapova hian harsatna a nei ṭan, hemi kum hian a dar (shoulder) na vangin clay court season a khel thei lo. 2008 Australian Open-ah khan rawn kir leh mah se a hliam ngai vang bawk hian season chawhnu lam zawng chu a inlan thei lo.

Hliam vangin a buai a, 2016 March thlaa a buaina erawh damdawi hman phal loh 'meldonium' a hmang tih hmuhchhuah a ni. Meldonium hi tun hma chuan khap zingah a tel ngai lo, Russian nula pawh hian kum 10 zet chu a lo ei tawh. Mahse, World Anti-Doping Agency lamin tun hnua an khap zingah a tel.

Season hnih inkhel thei lo tura hrem ni mah se Court of Arbitration for Sport-ah a zualko; CAS hian thla 15 atan a tih tawisak. 2017 April thla khan a rawn kir a, hrem a nih hnu hian Tianjin Open-ah champion leh mah se ngai a awh tawh lo.

Dar hliam vangin a buai a, a hnungzâng leh ban a hliam bawk. Beiseina sang tak nen a dam hun nghak ṭhin mah se tunhma a phak thei tawh lo, hliam vanga a harsatna hian a duh aia hmain tennis a mangṭha tir ta a ni.

l    January 2002 khan kum 14 leh thla kua chauha upa ni chungin Australian Open junior championhsip a khel a, inlan thei naupang ber a ni. Thla hnih hnuah a WTA tournament hmasa ber atan Pacific Life Open-ah a inlan.

l    Wimbledon 2003-ah khan wildcard pek a ni a, senior tournament a khelh hmasak ber niin fourth round a lut. Inelnaah hian seeded 11-na Jelena Dokic a hneh, ranking sang zual 20 zinga player a hneh hmasak ber a ni.

l    October 2003 khan WTA title hmasa ber a la, Japan Open final-ah Aniko Kapros chu 2-6, 6-2, 7-6 in a hneh a, ranking lamah a sang 50 zingah a vawi khat nan a inhlangkai.

l    Kum 2004 a rawn her chhuak a, tennis tournament upa bera ngaih Wimbledon final-ah Sharapova hian Serena Williams hnehin a champion, khawvel hriat a hlawh ṭanna a ni; a ranking pawh a sang 10 zingah a tel ta.

l    August 2005 WTA ranking chhuakah Sharapova hi world number 1 a ni a, Russian nula zinga tennis world number 1 ni thei hmasa ber a ni.

l    Court chhunga a hlawhtlinna chuan pawn lamah hlawkna a siam ṭan, Swiss rama sana (watch) manto siamtu Tag Heuer nen inremna an nei. British car manto siamtu Land Rover nen inremna an nei bawk.

l    Inelna lian Grand Slam bikah a hmasa bera Wimbledon (2004) a lak hnuin Australian Open (2008), French Open (2012, 2014) leh US Open (2006)-ah te hlawhtlinna a chang.

l    Australian Open 2016 hnuah damdawi hman phal loh meldonium a hmang tih hmuh chhuah a ni a, thla 15 chhung inkhel thei lo a hrem a ni. Hremna a hman zawh hnuah rawn kir leh mah se hliam vangin beisei a phak tawh lo.

l    February 2020 a her chhuak a, Russian nula hian a infiamna ngainat leh hmangaih ber a mangṭha.

"Tennis tan ka nung a, he infiamna hian nun min pe let thung. Zing takah ka tho a, ka pheikhawk dinglam aiin a vei lam hrui ka suih hmasa ngei ṭhin. Ball ka vuak ṭan hmain court kawngkhar chu ka khar leh phawt ṭhin, nitina ka hun hman ṭhin dan hi ka ngai dawn hle.

"Tennis hian hringnun thawnthu thui tak min zirtir a, hun thim leh hrehawma min hruai luh laiin dinhmun sang ber aṭangin khawvel min thlir tir bawk. Kum 28 chhung tennis khelin hun ka hmang tawh a, Grand Slam nomawi panga ka chawi. Tunah chuan hringnun thawnthu hi a bung thar ka kaipui a hun ve ta.

"Ka pa nena training kan neih lai, hnehna chan ṭum leh ka chak lo chang te, hun hrasa ka tawn laia tho chhuak leh thei tura min fuihtu zawmng zawng te, ka team leh ṭhiante zawng zawng ka ngai dawn takzet,"

- Maria Sharapova.