A thiam pariat zingah Magpies

Newcastle United chuan FA Cup quarterfinal lut turin West Brom chu 3-2 in an hneh a, he inkhelah hian Miguel Almiron chuan goal hnih a khung. 

Kum 26 mi Almiron hian first half chhungin goal hnih a khung a, second half minute hnihnaah Inter Milan aṭanga loan hmanga an hawh Valentino Lazaro chuan goal khat a khung ve bawk. Magpies hian 3-0 laia hma an hruai avangin awlsam takin quarterfinal an lut dawn niin a lang hman a, mahse Matt Phillips leh Kenneth Zohore ten Baggies tan an rawn khung ve leh avangin an hlauthawng hman. 

Mahse, Zohore-a goal khung hi hun pek belh a ni tawh a, Baggies tan comeback thlentir turin a tlai mah mah - Magpies boss Steve Bruce a lungawi lo hle. Bruce chuan, "Vanduaithlak takin a hnua goal chhuah hi kan thisenah hian a bet tel tlat a ni. 3-0 a nih avang mai khan kan inthlahdah a, awlsam lutuka kan ngaih avangin goal kan chhuah phah a ni. "Khatiang thil atthlak tak kha thlentir lo ila chu Newcastle kan ni nang! Awlsam turah harsatna kan insiam ṭhin a ni," tiin chak mah se a lawm lo. 

Premier League club dang Sheffield United chuan 2-1 in Reading an hneh bawk a, David McGoldrick chuan second 90 chhung lekin Sheffield goal hmasa ber hi a rawn khung. Championship club Reading tan George Puscas chuan penalty hmangin si phurh a sut a, goal dang a luh loh avangin extra time khelh a ngaih phah. Extra time-ah Premier League club danglamna a lang zui a, bench aṭanga luhtir Billy Sharp chuan Sheffield tan rawn khung ve lehin 2-1 in an chak ta a ni.