Meghalaya lungalhthei khur: Tang chhungten chhanchhuah hna tawpsanna tur lehkha pe
East Jaintia Hills, Ksan khuaa lungalhthei khura tang chhungte chuan state sorkar hnenah chhanchhuah hna thawh mek tihtawpna tur lehkha an pe.
Chhanchhuah hna hi December 13 aṭang khan Indian Navy, National Disaster Relief Force, State Disaster Relief Force leh Odisha Fire Service Personnel-te ṭangrual chuan ngawrh takin an lo kalpui tawh a, vawiin thleng hian an la kalpui mek reng a ni.
Lungalhthei khurah hian nikum December thla khan a laitu mi 15 chu ft. 300 chuanga thukah an tang a, tun thleng hian an ruang lakchhuah beseiin chhanchhuah hna hi la thawh chhunzawm zel a ni chungin ruang pahnih chauh lakchhuah an la ni thung.
Chhanchhuah hna thawh nan hian tha leh sum tam tak senga beih a nih mai bakah an tanna khur zim leh thuk taka tui tam tak a tlin reng vangin, a thawkte ruang hi ṭawih chhe viau tawh tura ngaih a ni. Revenue and Disaster Management Minister Kyrmen Shylla chuan April ni 30 khan lungalhthei khura tang chhungte lehkhathawn chu Garo Hills region MLA Dr. Azad Zaman kaltlanga a dawn thu chanchinthar lakhawm tute a hrilh, Meghalaya Chief Minister Conrad K Sangma in chhanchhuah hna tihtawpna tur thuchhuah a siam thuai beisei a nih thu a sawi bawk.