Arsenal mualah Valencia

Europa League semifinal first leg-ah Arsenal chuan zanin dar 12:30 hian Valencia an mikhual dawn. Premier League lama beisei phak lo, tun hnaia talbuai tak Gunners tan Spanish club hi awlsam taka hneh theih an nih a rinawm loh.

Gunners hian Unai Emery an neih avangin Europa League nomawi an beiseina a sang. Sevilla a enkawl laia vawi thum champion zawn thei manager hian a club thar hi league-ah palina a nih pui phak lo a nih pawhin European football-ah hlawhtlinna a chanpui a nih phawt chuan bul ṭanna ṭha tak a ni ang.

Spanish manager Emery-a'n 2008-12 chhung khan zanina an khingpui tur Valencia hi a lo enkawl tawh a, club chanchin leh kalphung bakah an chakna leh chak lohna lai a hrechiang hle ang. Mahse, a chhuahsan aṭangin season sarih zet a liam tawh avangin boruak a danglam hle tawh ang tih pawh a rin theih.

Kum 47 mi Emery chuan, "Club ropui leh sulhnu ṭha tak nei an ni a, awlsam taka hneh theih an ni lo ang," tiin Valencia chungchang a sawi lawk tawh a, a club hlui chu harsa lo taka paltlang ngawt theih an nih a rin loh thu a sawi.

Valencia lam pawhin Arsenal player hlui pahnih Gabriel Paulista leh Francis Coquelin te an nei a, anni pahnih hi Spanish club tan tun season-ah rinrawl an ni phak a, Gunners chak lohna lai thuruk chu an la hai lo khawp ang.

Brazilian defender Paulista chuan, "Arsenal tana khelh kha a ropuiin ka hriatreng tawh tur a ni. Mahse, tunah chua Valencia player ka ni a, club kum 100-na kan hman mek hi ropui taka hman kan duh a ni. Mipui te hian Valencia chu Paulista-a'n Europa League nomawi a chawipui, tia an hriatreng tur siamsak ka duh," a ti a, a club hlui lakah zahngaihna lantir a tum lo.

Ni riat chhung lekin Crystal Palace, Wolverhampton Wanderers leh Leicester City laka an tlawm avangin Arsenal tan Premier League table-ah a sang pali zinga tel beiseina a zuih zel a, mangchhia an neih mek lak aṭanga an harh chhuak thuai a nih loh chuan Europe League aṭang pawhin pet chhuah theih an ni.

League-ah che fuh rih lo mah se Europa lamah erawh quarterfinal-ah khan Gunners hian Napoli chu 3-0 in an hneh a, an mual leh khualmualah an hneh thei. Emery naute hi Italian club an hmachhawn ṭum ang bawkin Emirates Stadium-ah mikhual an thleng hmasa leh dawn a, thawnthu ngai ziah nawn ngei an duh ang.

Arsenal ang bawkin Valencia hi league lama beisei phak lo niin parukna an ni mek. Europa League quarterfinal-ah Villarreal 5-1 ngawta an sawp theih avangin tlarhnung phui lo tak Arsenal tana zuam sual theih tur tak an ni. 

Club pahnih hi tun hma lamin vawi nga an inhmachhawn tawh a, vawi hnih chak tawh Valencia chu record nei ṭha zawk an ni - Gunners hian vawi khat chu hneh ve thungin a dang chu an inhnehtawk.