Harden hliam niah Warriors chak nawn

Golden State Warriors chuan Houston Rockets 115-109 in an hneh a, NBA champion lai hian Western Conference semifinal series-ah 2-0 a hmahruaiin an dinhmun a duhawm ta hle. Pathianni zing dar 6:00 hian game 3 an khel leh dawn, an inkhelhna tur hmun hi Rockets mual Toyota Center a ni tawh ang.

Mualneitu Golden State lam hi an mahni mualah chuan chak tura rinkai an ni a, a tir aṭangin inkhel pawh an thunun. Rockets lam hian chak loh chhuanlamah an player ṭha ber James Harden mit (eye) hliam an hmang thei ang. Mahse, chhuanlam siamin result a ti danglam chuang lo.

Oracle Arena-a inkhelah Warriors lamin beisei ang ngeiin inkhel bul an ṭan fuh a, quarter hmasa berah 29-20 in hma an hruai a, point kuaa an inthlauh nghalna hi a tawp thlenga inkhel result siam danglamtu a ni tlang ta a ni.

GSW thiampuipa Kevin Durant-a'n point 29 neiin a thawh hlawk a, ani bakah hian inkhel bul ṭantu dang Stephen Curry (20 points), Klay Thompson (21), Andre Iguodala (16) leh Draymond Green (15) te chuan point 10 chuang vek neiin game 1 ang bawkin an chakna hnar an ni.

Quarter hnihnaah team pahnih te hian point 29 ve ve an nei a, quarter hnuhnung pahnihah Rockets hi point hnih leh point khatin sang zawk mah se quarter hmasa bera an hniam falna an insiamṭha zo ta lo.

Houston Rockets thiampuipa Harden-a'n quarter thumna tawp dawnah point neih tumin mawi takin layup mah se a hlah a, rebound lak leh a tumna lamah Green nen ball inchuhin hliam a tuar phah ta a ni.

American star hi lakchhuah a ngai a, amaherawhchu enkawl a nih hnuah rawn kir lehin hun tawp lam minute riat chhung vel chu a inlan leh hman - hliam nei loin khel tluang pangngai ni se boruak siam danglam thei tur a ni - minute 34 a khelh chhungin point 29 a nei hman.

Kum 29 mi Harden chuan, "A tirah kha chuan a na hle, hun rei lote chhunga a dam ka beisei," a ti. Rockets star hliamtu Green chuan a tihpalh a nih thu a sawi a, Rockets coach Mike D'Antoni pawhin a player ṭha chu chawlh a ngaih loh a beisei thu a sawi ve bawk.