Everton-a hlawhtlin inbeisei Holgate

Mason Holgate chuan Everton-ah kum nga dang khelh chhunzawm turin contract thar a ziak a, kum 23 mi centre back hian Goodison Park-ah nomawi chawi ngei a beisei thu a sawi. 

Manchester City-in an duh nia sawi defender hi Carlo Ancelotti enkawlna hnuaiah Merseyside club tana player pawimawh a ni a, tun season inelna hrang hrangah match 26 a khel tawh. Kum 2015-a League One club Barnsley aṭanga pound maktaduai hnih bawr vela Everton pantu defender chuan, "Club-in hma a sawn dante ka hmuhin he club-a cham zel hi ka duh a, theihtawp chhuaha chona hautak zawk hmachhawn zel kan duh.

 

"Nomawi chawi ngei ka duh a, he hmunah hian chu chu kan tih ngei pawh ka ring tlat a ni," a ti a, Everton chu nomawi chawipui theih a inring.