Tottenham Hotspur Stadium-ah Ajax-in goal an khung a, an goal an humhim

Rawlthar rual awm khawmna Ajax-in Thawhlehni zan khan Tottenham Hotspur 1-0 in an hneh a, away goal hlu tak avang hian Champions League final khel turin an dinhmun a ṭha hle. Semifinal first leg-ah hian Ajax midfielder Donny van Beek chuan minute 15-naah goal awmchhun a khung a, May 8 zan hian Johan Cruyff Arena-ah second leg khelh leh tur a ni.

Spurs manager Mauricio Pochettino chuan inkhelh hmain Dutch Football thuneituten Ajax fixtures an thlak sak chu 'fair lo' a tih thu a sawi a, an khingpuiten inpuahchahna hun ṭha an ngah chu a pawm thiam chiah lo. Ajax manager Erik ten Hag chuan, "Eredivisie kan khelh avangin euro maktaduai 10 kan dawng a, anni chuan Premier League khelh vangin maktaduai tam tak an dawng. Hamṭhatna dawn hi a inang tlang vek thei lo a, kan pawm thiam zel a ṭul," tiin a chhanglet.

Manager pahnih ṭawngka aṭangin team pahnihin a ṭha zawk anga chhal an duh lo ve ve tih a lang a, amaherawhchu an player neih dan thlir erawh chuan Spurs chu club lian zawk an ni tih a lang. Spurs tana bul ṭantu defender pathum Toby Alderweireld, Jan Vertonghen leh Davinson Sanchez bakah playmaker Christian Eriksen te chuan Ajax aṭangin English club an zawm. 

Chutihrualin Ajax hian rawlthar ṭha zinga che tla turin tawnhriat nei ṭha Daley Blind leh Dusan Tadic te an lalut a, an player chherchhuah thar dangte lah Europe club ṭhate chil tiputtu an nih avangin Spurs lakah an te bik lo. Dutch club hian champion lai Real Madrid leh Juventus an hneh a, heng club pahnih hi Spurs aia lian ve ve niin Juve coach Massimiliano Allegri pawhin Ajax chu an khelh ṭhat zawk vangin an hneh lo tih a pawm.

Tottenham leh Ajax khelh dan hmang a inang a, passing hmanga khingpuite ṭhiat ṭhin leh football mawina pholang ṭhin ve ve an ni. Amaherawhchu Spurs-in an striker pawimawh Harry Kane an chhawr thei lo a, English striker tluk zeta ṭangkai Son Heung-min chu hrem vangin a inlan thei lo. London club squad a chhah bik loh avangin Pochettino-a'n player ṭha pahnihna thlakna tur ṭha a nei tawh bik lo a, Spanish striker Fernando Llorente-a'n ṭhatna lai nei mah se a theihna leh Spurs game a inmil tawk lo.

Mikhual Ajax khualmualah an inthlahrung lo a, ball an chan loh pawhin awmze neiin pressure an pe. Dutch club hian Spurs defender te ball in pe kual thlengin an tibuai pha a, an tlan tam leh huaisen rah sengin English club lakah an chungnung zawk.

Spurs-in bul an ṭan ṭha lo a, Ajax player-te an box pawn chiah thlenga duh tawka an in pass-tir avangin hremin an awm. Moroccan midfielder Hakim Ziyech chuan fing takin Donny van Beek tan a pe a, kum 22 mi hian a hun thawl neih chu 'tawnhriat ngah tawh tak' ang maiin second khat pawh hmang sual loin goal khung nan a hmang.

Ajax aṭanga inzir chhuak Van de Beek hi centre midfielder ni mah se a hna a zirin a tawlh hma hreh lo a, an fakna ber pawh a hun takah a hmun taka a awm ṭhinna hi a ni. Spurs nen hian hun thawl a neih theih nan offside trap a bum chiang a, Juventus lama goal a khung ṭumin hetiang tho hian Italian defender tlarhnung a bum tawh avangin tihfuh ringawt chu a ni lo.

Dutch club-in vei lam kilah David Neres an dah a, vei lam aṭang hian an nawr na lehzual. Neres, Van Beek leh Dusan Tadic te inthlawp chu Spurs tan buaina tham a tling a, an hmuhnawm tel bawk. Second half-ah Spurs an rawn insiam ṭha a, ball chang tam mah se Ajax-in goal an khung teuh zawk. Minute 79-naah Tadic-a ball pek chu Neres-a'n goal ban pet per nan a hmang a, goal-ah lut se Spurs tan thawhchhuah a harsa tawh ang.

Tottenham defender Vertonghen chu a khelhpui Toby Alderweireld  leh Ajax keeper Andre Onana te nen an insutnaah a inhliam a, minute nga chhung khelmuala enkawl a nih hnuin pawnah buaipui chhunzawm a ni. Belgian defender hliam tawrhna hi a lu a nih avangin fimkhur thil thuah minute 39-naah Moussa Sissoko hmangin thlak a ni.

Spurs hian goal zawnah vawi khat chauh an pet avangin an khelh dan aṭanga thlir chuan an chak loh dan hi vanduai tih tur a ni lo a, amaherawhchu hun pawimawhah an player pawimawh an chhawr theih loh avangin an vanduai thung. Second half-ah insiam ṭha mah se Son-a leh Kane awm loh vangin tlarhma a bil a, Dele Alli-a'n tun hnaia a khelh ṭhat loh a chhunzawm zel avangin goal khung tur khawpin an khel ṭha lo.