Mapuia Cricket League-ah Kulikawnin final an lut

Mapuia Cricket League-ah final lut pakhat a chiang ta a, Kulikawn chuan nimin khan wicket ruka Chhinga Veng hnehin final hi an lut.

League round match hmasa berah khan Kulikawn hian Chhinga Veng hi an ngam lo a, mahse hun pawimawh takah an hneh let a, May 4-a final khel turin an tling. 3C erawh an chak zawh loh avangin eliminator-a hnehna chang Ramhlun Venglai nen vawiin chawhma dar 10:30 hian Sihhmuiah final khel tur an zawng ang.

Suaka Cricket Ground-a inkhelah Chhinga Vengin bat hmasak an thlang a, over 20-ah run 114 siamin wicket kua an hloh a, Raj Kumar Thakur chuan ball 25-a hmachhawnah run 35 a rawn vaw chhuak.

Kulikawn tan Moses Ramhlunmawia a che ṭha a, man of the match-a thlan zui bowler hian over li-a vawmah run 28 lek a pe a, wicket li a la bawk.  

Kulikawn bat hun a thleng a, Raihan Jomeel chuan run 43 a rawn vaw chhuak - Michael Remkima'n run 26 a rawn thawh ve bawk a, 3C bowler-te an che hleithei lo. 

Over 19.1-ah Kulikawn hian an target an umpha a, wicket li lek hloh chungin hnehna an chang - he team hian match li chhung chu a zawnin hnehna an chang ta tihna a ni a, 3C an hneh leh tak avangin MCL-a club pali te hi an hneh kim ta vek bawk.

Eliminator-ah Chanmarians chu coin toss-ah an vannei a, vawm hmasak an thlang. Ramhlun Venglai lamin bat hmasain Joseph leh Malsawmdinpuia ten run 44 leh run 26 an siam a, Chanmarians tan run 127 target an siam sak. 

Chanmarians bat hun a thleng a, RVL bowler Lalrintluanga chuan hming ṭhat nan hmangin run 4 lek pein wicket nga a la a, an team chhanhimtu a ni. Chanmarians hian run 78 chauh an siam a, 48 runs-in RVL an chak.