19th MFA CUP Final-ah Lunglei leh Aizawl

Nimin khan MFA Cup vawi 19-na semifinal chu CYLA Playground, Lawngtlaiah khelh a ni a, inkhel pahnih a hmuhnawm ve ve. Lunglei club Zotlang FC chuan final lut turin Vairengte club FC Rengkhawpui 4-3 in an hneh hram a, Aizawl club Aizawl FC Junior-in Champhai club Kahrawt FC 2-1 in an hneh ve bawk.

Final hi May 3, Zirtawpni tlai dar 1:00-ah khelh tur a ni a, Zotlang FC leh Aizawl FC Junior te an inhmachawn ang.

Group stage an khelh dan thlirin Zotlang FC tan final kalkawng a harsa lo niin a lang a, amaherawhchu mipui rinlawkna hi first half-ah chiah a thleng dik. Kolasib district aiawh FC Rengkhawpui-in second half-ah an huaisen zia an pholang a, final thleng lo mah se an khelh danah demtu an awm lo ang.

Lunglei club hian minute 39-naah goal thumna an khung tawh a, first half-ah hian Joseph Lalvenhima'n goal hnih a khung bakah Alan Lallawmsiama'n goal khat khung bawkin an ke khing khatin final an rap tawh. Lawngtlai khaw lumah Vairengte tlangval an fei a, FC Rengkhawpui hian chak beiseina an neih bawk avangin second half minute 69-na lekah Isaac MS Kima, Hmangaihzuala leh Rosangliana te goal khat ṭheuh hmangin an siphurh an sut zo.

Lunglei club player-te naupanna a lang a, chutihrualin goal thum an hum lohna chhan bulpui erawh an fimkhur tawk loh vang a ni. Goal thum hmangin coach F. Lalrozara naute ben harhin an awm a, minute 88-naa Lalrintluanga goal hmangin Zotlang FC-in hnehna an chang.

Aizawl FC Junior-in an club history-a an la chawi ngai loh MFA Cup chawi theihna hun ṭha an nei a, an senior team pawhin an la chawi loh lak theihna remchang an bawhpelh lo. Coach Rohmingthanga hote hian semifinal-ah bul an ṭan ṭha a, F. Lalhmangaihzuala chuan minute sarihna lekah khungin David Lalhlansanga'n minute 26-naah a khung belh. First half-ah 2-0 a nih tawh avangin Aizawl district aiawh club dinhmun a ṭha. 

Amaherawhchu semi-final hmasa zawk ang thoin Kahrawt FC-in hun tawp lamah AFC Junior tan harsatna an siam a, minute 78-naah F. Lallawmkima'n Champhai club tan khungin siphurh sut turin goal khat chiah an mamawh tawh. Kahrawt FC-in goal khung belh thei lo mah se mah se Aizawl club nuam sain an awm lo.