Lyon mualah Juve leh Ronaldo an mualpho

Kar hmasa khan Cristiano Ronaldo chuan Serie A match 11 chhung a zawna goal khung record a nihrual a, kum 35 mi ni tawh mah se a la chuai lo tih khelmualah a pholang. 

Champions League hun a her chhuak a, a tak ramin Ronaldo a lo hmuak. Ligue 1 club Lyon khelmualah 1-0 in Juventus an tlawm a, goal zawna pet an nei miah lo!

Kum 1996 hnua a vawi khat nana European champion nih inbeisei Juventus dinhmun a chhia a, round of 16 paltlang lo thei dinhmunah an ding mek. Second leg hi March 17 zanah an khel ang. 

Lyon manager Rudi Garcia-a'n Ronaldo dan bik dan tur an ruahman loh thu a sawi lawk a, a sawi ang ngeiin French club an khel - tihsual an nei tlem a, tlarhnung an inremphui ṭha a, player bitum bik an nei lo. 

Juventus-in inrintawkna sang tak nen inkhel bul ṭan mah se chance mumal an insiam thei lo a, goal khungtu chu Ligue 1 lama beisei phak lo Lyon zawk an ni - Lucas Tousart chuan minute 31-naah a rawn khung. Karl Toko Ekambi chuan bar a tauh per bawk. 

Italian club-in tlawm duh lo mah se 60% ball chang chungin goal an zawng hmu thei lo a, Ronaldo, Paulo Dybala leh Juan Cuadrado te inkawpin Lyon goalkeeper Anthony Lopes tan hna an siamsak thei lo. 

Ronaldo tel lo pawhin Juve-in Serie A-ah ro an rel a, league hnuhnung pariatah an champion. Portuguese forward an lakluh chhan hi Champions League nomawi chawi an duh vang a ni a, season hmasa khan quarterfinal-ah Ajax an ngam lo. 

Tun season-ah last 16 first leg chauh khel an la nih avangin Juventus thai bo ngawt theih an la ni lo a, mahni muala khel tur an nih avangin beiseina a la awm - mahse Nilaini zana an khelh danah erawh chhuan tur a tlem hle.

Ronaldo meuh a 'Nil' a, Portuguese forward hian position ṭha tak aṭangin goal khungna remchang vawi li ngawt nei mah se goal zawna pet a nei miah lo. 

Lyon hian nikum kum tawp lama inhliam captain Memphis Depay an chhawr thei lo a, mahse Depay awm loh laiin kum 21 mi Houssem Aouar a hmuhnawm takzet - Juve midfield dah niltu tih ngam a ni. 

Aouar hian ball a keng ngam a, a thutlukna a fing a, key pass vawi thum a nei thei. Tousart goal khung tur a pass-te chu player thiam bik ke aṭanga chhuak awm renga mawi a ni a, hetihlai hi lu hliam avanga defender Matthijs de Ligt-a inenkawl avanga Juve player kim loh lai a ni thung. 

Boss thar Maurizo Sarri hnuaia 'zonal marking system' thar chu Juve hian an la bel lo niin a lang bawk a, he system thar an hman hi defender pawimawh Leonardo Bonucci chuan hriatthiam har tiin a lo sawisel tawh. 

Goal hnih khung theihna remchang kan neih kan chhawr lo kha ka ui ber. Juventus Stadium-ah pawh goal khung leh kan tum dawn - first half chauh kan la khel a, uang thei kan la ni lo. 

-  Rudi Garcia, Lyon coach

Kha aia rang zawka ball inpe tur kan ni tih ka naute ka hrilhfiah thei lo hi ka hrethiam lo a, training-na kan phak lo a ni. First half aiin second half-ah kan ziaawm a, mahse Champions League-ah chuan chu chauh chu a tawk lo. 

- Maurizio Sarri, Juventus boss

Champions League

Last 16 First Leg

February 18, Thawhlehni zan

Atletico Madrid    1 - 0    Liverpool

ALT : Saul Niguez 4'

Borussia Dortmund    2 - 1    PSG

DOR : Erling Braut Halaand 69', 77'

PSG : Neymar 75'

February 19, Nilaini zan

Atalanta    4 - 1    Valencia

ATA : Hans Hateboer 16', 62'; Josip Ilicic 42'; 

   Remo Freuler 57'

VAL : Denis Cheryshev 66'

Tottenham    0 - 1    RB Leipzig

LEI : Timo Werner 58' (P)

February 25, Thawhlehni Zan

Chelsea    0 - 3    Bayern Munich

BAY : Serge Gnabry 51'; 54'; Robert Lewandowski 76'

Napoli    1 - 1    Barcelona

NAP : Dries Mertens 30'

BAR : Antoine Griezmann 57'

February 26, Nilaini Zan

Lyon    1 - 0    Juventus

LYO : Lucas Tousart 31'

Real Madrid    1 - 2    Manchester City

REA : Isco 60'

MANC : Gabriel Jesus 78'; Kevin De Bruyne 83' (P)