Casilla insawifiahna pawm lo

Leeds United goalkeeper Kiko Casilla chuan vun rawng inhmuhsitna avanga a ṭawngkam hman chu 'a hriatthiam loh vang' a nih thu sawi mah se Football Association hnuaia a chhui chiangtu independent commission lam chuan an pawm lo.

Kum 33 mi keeper hi kar hmasa khan inkhelh laia vun rawng inhmuhsitna lam ṭawngkam a hman avangin match riat atan an hrem a, £60,000 (Nuai 56.28) chawi turin an ti bawk. September 28 khan Leeds hi Charlton Athletic nen an inkhel a, he inkhelah hian Casilla hian Charlton forward Jonathan Leko nen an intihbuaina lamah vunrawng inhmuhsitna ṭawngkam hi a hmang a ni.

 

Casilla chuan, "January 2019-a England ka pan hnuah sap ṭawng ka la thiam tam lo em em a, ṭawng lettu ka hmang ṭangkai ṭhin hle," a ti a, Charlton forward Leko laka a ṭawngkam hman chu vunrawng hmuhsitna ṭawngkam a ni tih a hriat loh vang a nih thu a sawi.