Khelo India Scheme Thlan zingah Mizo boxer pahnih

Kumin January thlaa neih zawh tak Khelo India Youth Games vawi hnihnaa medal latu Zorammuana leh Laldinsanga te chu Khelo India Scheme hnuaiah 'incentive' dawng turin an thlang. 

Khelo India Scheme-a thlante hian stipend an dawn bakah India rama Academy ṭha an duh thlannaah an awm thei a; sports bungrua, an thlenna (acoomodation) bakah ei leh in a thlawn vekin an dawng ang. Heng mi bik te hi Asian/World/Olympic thlenga khel thei tura India-in a enkawl tur bik te an ni. 

Khelo India-ah khan Tuipui rawlthar Zorammuana (Valtea) hian 48kg category-ah Madhya Pradesh boxer Anan Yadav (5-0), Himachal Pradesh boxer Abhinav Katoch (3-2) leh Haryana boxer Kabir Pandit (5-0) te hnehin final an lut a, gold medal inchuhnaah Maharashtra boxer Bishwamitra Chongtham a hneh lo.

Kapzathanga leh Hmangaihthangi te fapa Valtea hian Khelo India-a silver medal a lak hma hian nikum November thla khan National School Games, Guwahati-a neihah silver medal a la tawh bawk a ni. Lunglei Ramthar rawlthar Dina hi 'wild card' hmangin Khelo India boxing inelna 50 kg category-ah telh a ni a, final hial a thleng. Dina hian Himachal Pradesh boxer Virender Singh (5-0), Uttar Pradesh boxer Javed (3-2) leh Haryana boxer Naveen Siwach te a hneh hneh hnuin final-ah Maharashtra boxer Aman Yadav a hneh lo.

Vanhnuna leh Lalsiamliani te fapa Dina hian nikum khan All India Inter SAI, Rohtak-ah silver medal a dawng tawh bawk. Mizoram boxing-in hma a sawn theih nan Sports & Youth Services Department (SYS) leh Mizoram Boxing Association ten theihtawp an chhuah a, hmasawnna hmuh tur a awm chho zel a ni.