Cricket World Cup - A hun a thleng hnai ta

ICC Cricket World Cup 2019 chu May 30 hian khelh ṭan a ni dawn ta a, inelnaa tel tur team 10 pawhin an squad an puang fel tawh.

July 14 thlenga neih tur inelna hi England leh Wales-in an inthlen ṭawm dawn a, a format hi one day international a ni - chumi awmzia chu over 50 zel an khel dawn tihna a ni. Cricket World Cup hi India-ah chuan Star Sports-in live-in an pe chhuak ṭhin dawn a, online-a en duh tan Hotstar lamah a en theih ṭhin bawk ang. 

DD Sports chuan India match leh semifinal chin aṭangin en theih turin a pe chhuak ve dawn bawk a, inelna neih chhung hian match 48 khelh a ni ang. 

England chu inelna thlengtu an nih angin World Cup-ah hian tling chiang sa an ni a, ODI ranking-a top seven chin Australia, Bangladesh, India, New Zealand, Pakistan, South Africa leh Sri Lanka chu tling chiang an ni. 

Qualification round hmang hian inelna thleng tur thlan a ni bawk a, Afghanistan leh West Indies chu qualifier hmang hian World Cup khel tur hian an invaw kai bawk a, inlan tur hi an vai hian team 10 an tling. Inelnaa inlan tur team 10 te hi group-ah ṭhen hran an ni lo a, an vai hian an inkhel kual vek dawn. Inkhelh kual vek hnua a sang pali chuan semifinal an lut ang a, a bak zawngin World Cup an mangṭha zui ang. 

July 9 leh 11-ah semifinal hi khelh nghal a ni dawn a, table-a pakhatna leh palina intawngin, pahnihna leh pathumna an inkhel bawk ang a, July 14-ah final an khel ang. 

World Cup hi England leh Wales-a khawpui 10-ah khelh tur a ni dawn a, Birmingham, Bristol, Cardiff, Chester-le-Street, Leeds, London, Manchester, Nottingham, Southampton leh Taunton khawpuiah te khelh a ni dawn. 

Semifinal match khat zawk hi Old Trafford Cricket Ground, Manchester khawpuiah khelh a ni ang a, semifinal pakhat chu Birmingham khawpuia Edgbaston Cricket Ground-ah khelh a ni thung ang. Cricket ngainatu zingah Lord's Cricket Ground hre lo an awm kher lo mai thei, he stadium hmingthang hi kum 1814-a sak daih tawh kha niin final a thleng dawn - London khawpuia awm a ni. 

Stadium zingah Old Trafford chu match khelh hnemna ber tur hmun a ni a, match ruk a thleng dawn - semifinal match bakah league match ruk a thleng dawn a, match nei tlem ber tur Riverside Ground leh Rose Bowl ten match thum ve ve an thleng ang.  

World Cup-ah hian umpire 16 an awm dawn a, International Cricket Council chuan match referee turin hming paruk a puang tel bawk. 

Umpire zingah hian Sundaram Ravi chu Indian tel awmchhun a ni a, kum 2015 khan ICC Elite Panel of Umpires-ah telin Indian zingah Srinivasaraghavan Venkataraghavan hnua he dinhmun luah leh thei hmasa ber a ni hial. 

Ravi hian 2011 aṭang khan ODI leh Twenty20 international-ah chuan umpire hna a thawk ṭan a, test chu kum 2013 aṭang khan a enkawl ṭan. World Cup inelna tur ODI hi match 42 a enkawl tawh. 

Kum 61 mi English umpire Ian Gould chuan World Cup enkawl hna a thawh zawhah hian a hna a chawlhsan tur thu a puang a, ani hi a vanglaia England tana ODI match 18 khel thei a ni. 

Team 10-in ram aiawh tur player hming an puang kim tawh a, squad tinah hian player 15 aia tam an awm thei lo. New Zealand chuan April 3 khan squad puangin a puang hmasa ber an ni a, April 24-a puangtu West Indies chu a puang hnuhnung ber an ni thung. 

New Zealand Wicket-keeper Tom Blundell leh Bangladesh fast bowler Abu Jayed-te chu ODI an la khel ngai lo chungin squad-ah telh an ni a, captain zingah England captain Eoin Morgan, West Indies captain Jason Holder leh  Bangladesh captain Mashrafe Mortaza-te chu World Cup-a captain nichunga ram ai lo awh tawh an ni. 

World Cup-a inlan tur zingah hian India chhuanvawr MS Dhoni chu ODI khel hnem ber niin vawi 341 a inlan a, captain zingah Virat Kohli chu ram tana inlan hnem ber niin India captain hian match 227 a khel tawh. Ram tana inlan ve tawh hrim hrim zingah Nicholas Pooran chu ram tana ODI la khel tlem ber a ni a, West Indies aiawh tur cricketer hian ODI match khat chiah ram tan a la khel.