TNT aia thiam zawk Tuichangral

Tuichangral chuan Suzuki Gixxer Pro Volleyball League 2019 nomawi chawi an tum ngam tih an lantir chhunzawm a, league match vawi li an khelh tawhah point 10 hmuin table-ah pathumna an ni.

Nilaini zan Chawnpui Sports Centre-a inkhelah Tui­chang­ral hian 15-12, 15-10, 11-15, 16-14, 15-13 (4-1) in Thutak Nunpuitu Team an hneh a, semifinal lut tura an dinhmun an sawhngheh laiin TNT erawh tun season bikah chak ni hmel an la hmu thei lo.

Tuichangral lamin a tir aṭang­a a tawp thlengin inkhel an thunun a, tlakhniam deuh lai chu nei mah se harsatna lian tham an tawk lo. Point 29 zet thawk chhuaktu Jaideep Sandu chu RS Traders Player of the Night atan thlan a ni.

Match hmasa pahnihah Chhinga Veng Spikers leh Hun­thar ngam lo mah se Tuichangral hian Durtlang North an hneh dan (4-1) bawkin TNT an hneh thei a. PVL bul ṭan fuh lo mah se an insiam ṭha tawh hle - season hmasa finalist hi Chanmari West nen an la inhmachhawn leh ang.

Aizawl khaw pawn team hian Jaideep theihna an chhawr ṭangkai a, point a hmuh hnem bakah vawi li chiah tihsual a nei a. Mizo player zingah point 10 nei tling an awm lo a, point riat neitu Rinchhana bakah captain Sawmsanga leh Lalnunfima-ten point nga ve ve an hmu bawk.

PVL club dang ten an team ti chak turin state pawn player an chahlut vek a, hetih lai hian TNT erawh Mizo hlangin an khel thung - match li khelhah hnehna la chang loin table mawngphah luahlumtu an ni.

Muanna Veng team tan point kua neitu Hosanna Lalawmpuia chu thawh hlawk ber niin point kua a nei a, vawi thum a tisual thung. Set thumna an lak bakah set hnuhnung pahnihah beisei nei sang ve deuh mah se match dang ang bawkin boruak sangah an talbuai.

TNT hian Inrinni zanah Dur­tlang North an bitum leh dawn a, league khar nan Anastasia Electric Veng an khelhpui ang. Semifinal beiseina chu bo vek ni lo mah se a harsa tawh dawn hle. Coach Lalrindika chuan, "Kan dinhmunah kan buai lo a, vawi khat tal hnehna chan kan tum ang," tiin an ropui tawh ṭhinna PVL-ah theihtawp chhuah chhunzawm an tum thu a sawi.

Kuminah hian a vawi khat nan senior bakah junior team ten inelna an nei ve zel a, tual­chhung player naupang zawk ten hmasawnna an neih theih nana tih a ni. Junior league ang bawkin hmeichhe inelna pawh neih a ni dawn.

Ladies Pro Volleyball Lea­gue-ah hian team pali - Bung­­­kawn, Kanan, Bethlehem Veng­thlang leh Durtlang te an inel dawn. Zirtawpni tlai dar 4:00 hian match hmasa ber atan BVT leh Kanan te an inhmachhawn ang.