Nou Camp-ah Liverpool an tlangnel sual

Barcelona khelmual Nou Camp-ah Liverpool-in huaisen takin an khel a, amaherawhchu an khingpui Catalan club hi footballer piang tawha mi tam takin thiam bera an chhal Lionel Messi telna a nih avangin an tlangnel sual.

Nilaini zan Champions League semifinal inkhelah Barca tan Reds player hlui Luis Suarez chuan goal hmahruai a khung a, second half-ah Messi-a'n goal hnih khung leh bawkin Ernesto Valverde hote 3-0 in an chak. May 7 zan hian Anfield-ah second leg khelh a ni dawn a, khualmuala goal khung lo Jurgen Klopp-a hote tan hmabak a hautak ta hle.

Barcelona hian Liverpool player duhlai Suarez leh Philippe Coutinho-te chu tun hmain an chhuhsak tawh a. Reds-in Brazilian magician tih hiala hming lem an pek Coutinho pawhin Nou Camp-ah khelhna hmun chan a harsat tih hre reng chungin 'attacking football' an la khel ngam.

Liverpool hian Barca player-te ball in pass lai an thlir bik lo a, Sadio Mane leh Mohamed Salah te hmangin an rum ṭhaih a. Amaherawhchu, Spanish club chu Premier League club tenau ang ngawt an ni lo a, Reds tlarhmaten hnai taka an hnaih chilh chung pawhin defender aṭanga keeper Marc-Andre Ter Stegen thlengin mawl deuha petchhuah an nei lo. 

Barca-in harsatna an tawk tih zep rual a ni lo a, ṭum dang angin ball an inpe kual thei lo. Manager Ernesto Valverde erawhin thil thlen dan tur a thlir lawk thiam a, Liverpool chhutna tur a duang ṭha tih an khelh danah a lang.

Inkhelh ṭantirh lamah mualneitu hian Ivan Rakitic leh Coutinho te hmangin chance satliah an nei a, minute 26-naah erawh chance naran anga lang chu player class hmangin goal hmahruai khung nan an hmang. Barca hian dinglama ball awm chu Arturo Vidal hmangin vei lamah an sâwi thut a, Reds hian right back-ah centre back-a awm thin zawk Joe Gomez an hmang tih hriat a ṭha.

Vidal ball vawrh chu Coutinho-a'n la thlain Jordi Alba a pe a, Spanish left back hian Suarez tlanna tur hmun ruak a thlir hnuah Reds box chhungah ball fing pe lutin Virgil van Dijk lak aṭanga tal put Suarez chuan a tlawh lut. 

Liverpool hian Suarez chance aia chance ṭha hi minute 35-naah an nei a, Mane chuan Salah hnena a ball hmuh chu keeper chauh a hmachhawn hnuah a pet over.

Second half ṭantirhah pawh Reds goal bawh a na a, minute 15 chhungin James Milner-a'n ṭum hnih nei hmanin Salah-a'n ṭum khat a nei a, keeper Ter Stegen-a'n a dang vek. Milner-a'n petna tur hun awl a neih theih nan Salah ball pass chu Georginio Wijnaldum-a'n mawi zetin a 'dummy' a, hun thawl ngah English player finishing erawh a ṭha lo.

Reds hian goal thum an chhuah hnuah chance ṭha bik an nei leh a, substitute Roberto Firmino ball pet chu goalline aṭangin Ivan Rakitic-a'n a dang hram a. Ball per chu English club ṭantuten Messi nena an khaikhin ber Salah-a'n keeper awm tawh lo chungin goal zawnah pet thei loin goal ban a pet per a, an vanduai hle.

Barcelona-in nuamsain an khel thei lo a, Reds player-te'n Messi an hual nasa a, mualneitu lamin loh theih loin long ball an vawrh a ngai. English club-in goal khung se inkhel hmel hmang a dang vek thei a, Valverde aiin Klopp-a'n fak a hlawh zawk ang.

Chutah tak chuan mamawh chhanna Messi a rawn lang a, ani hian hmun chep aṭangin ball a la chhuak thei a, awmze neiin ball a khalh a, ball pass a ṭhulh bawk si loh avangin Liverpool tan buaipui tham a tling. Barca captain Messi hian Arturo Vidal tan ball ṭha a pe a, engmah loah a chhuah. Minute 75-naah Messi hian Sergio Roberto nen ṭangkawpin Suarez tan ball ṭha an chhawp sak a, Uruguayan forward hian goal ngei tura ngaih hi crossbar pet per nan a hmang. Ball-in crossbar a per lai hian Messi chu Reds chhuanvawr Virgil van Dijk hnungah a awm a, amaherawhchu a per nang fuhtu chu Argentine forward hi a ni a, Dutch defender hi goal venghimtu ni loin a goal lai thlir hnaitu zinga mi a ni.

Minute 82-naah Messi ropuina belhchhahin a awm a, yard 25 chuang aṭangin freekick mawi zetin a pet goal. Replay thlir nawn loh pawhin Reds keeper manto Alisson a tan tih theih a awm loh zia a lang a, thlir nawnin Messi ball pet thiam zia a lang chiang a, Barcelona tana a goal 600-na a ni. Catalan club tan goal thum hi a ṭha tawk a, chutihrualin injury time-ah Messi pass ṭha zet chu substitute Ousmane Dembele-a'n keeper chiah a hmachhawn hnuah Alisson zawnah a pet a, Reds-in beiseina tlem an neih phah bawk.