Casillas dinhmun a ṭha

Spanish goalkeeper Iker Casillas chu 'heart attack' vangin buaipui ngaiin a awm a, footballer langsar a nih avangin ngaihventu pawh a ngah hle. 

Kum 37 mi Casillas hi PC Porto-in training an neih laiin lung lam harsatna avangin a buai a, damdawi-in panpui a nih hnuah ngaihtuahawm a ni tawh lo a, damdawi-inah enkawl mek zel a ni. Portuguese club chuan thuchhuah siamin, "Casillas hi Hospital CUF Porto-ah enkawl a ni a, a dinhmun a nghetin a ṭha," an ti. A club hlui Real Madrid pawhin dam leh thuai tura an duhsakna thu an chhuah bawk.

Spain international Casillas hian ram tan match 167 khel tawhin 2010 khan an ram chu World Cup-ah a champion pui a, 2008 leh 2012 khan European Championship-ah hlawhtlinna a chanpui bawk a ni. Ram tana hlawhtlinna a chan ropui ang bawkin club lamah pawh a hlawhtling. Real Madrid tan match 725 khelin Champions League nomawi pathum leh La Liga title panga a chawi pui hman - Spanish club aṭangin Porto a pan a, 2018 khan league nomawi a chawi pui leh tawh bawk.