Vawiin tlaiah MFA Cup Dream Final Zotlang FC Vs Aizawl FC Junior

MFA Cup vawi 19-na final chu vawiin tlai dar 1:00 hian CYLA Playground, Lawngtlaiah khelh a ni dawn a, team ṭha pahnih Zotlang FC leh Aizawl FC Junior te an inhmachhawn ang.

Lunglei club Zotlang FC leh Aizawl FC Junior ten final kawngah hneh loh an tawng lo a, an group awmnaah hmahruaitu ve ve an nih avangin 'Dream Final' ang hiala sawi theih a ni. 

Lunglei hian kum 2008 khan tun ṭuma inelna neihna hmun Lawngtlaiah hian MFA Cup nomawi an chawi tawh a, kum 11 hnuah Lunglei club Zotlang FC hian an rual u zawkte sulhnu chhui an tum ang.

Zotlang FC enkawltu coach F. Lalrozara hian MPL club Ramhlun North bakah first division club Zo United a enkawl tawh avangin Aizawl FC Junior hi a tan team thar an ni lo a, a tawnhriat hian game plan siam kawngah a puih a rinawm.

Zotlang tan Joseph Lalvenhima chuan match hnuhnung pathumah goal khung vekin goal nga a khung tawh a, goal li khung tawh M. Lalrintluanga leh goal thum khung tawh C. Vanlalhlua te chu goal nawr kawngah an 

ṭangkai ang.

Darzo tlangval Rozara chuan, "Keini hian ni sa hnuai hi kan chang fuh thei a, khua a lum bawk avangin inkhelh a harsa hle. Tun ṭumah chuan tlai ni nemah kan khel turah ngai ila, kan theihna tak tak kan lantir thei tawh ang. Champion ngei kan tum," tiin Vanglaini a hrilh.

Aizawl FC Junior team hi an khelh tawh chin thlirin team ṭha ber an ni a, final-ah semifinal-a an chhawr theih loh Lalchungnunga a rawn let dawn a, tlarhnung a phui sawt ang.

Coach Rohmingthanga hote hian tun inelnaah goal hnih chauh an la chhuah a, an tlarhnung a phui ang bawkin goal an khung thei bawk - match li lekah goal 17 an khung tawh. Tualchhung club lian ber ang hiala chhal theih Aizawl FC hian MFA Cup nomawi an la chawi ngai lo a, tun ṭumah hian an junior team-ten club tan mellung phun theihna hun ṭha an nei a, bawhpelh an tum lo ang.