Liverpool tan tawpna ni a hnai em ni?

Kum 2020 a herchhuah khan Liverpool chet chhiat a hnaih thu sawi ta ila, thusawi min ṭawmpuitu aiin hnialtu an tam zawk ang. 

Mahse, 'khawvela team ṭha ber' tih hiala an hmachhawn tur team apiangin an chanchin an sawi Liverpool an tlu sawp a, an match hnuhnung paliah vawi thum an tlawm ta. Nilaini zan khan FA Cup round of 16-ah Liverpool hian Chelsea an lenchilh a, Stamford Bridge-ah Willian leh Ross Barkley te goal khung vangin 2-0 in an tlawm.

 

Kar hmasa lawkah Premier League-ah 'invincibles' champion an beiseina chu a thamral a, Reds fan-te treble champion nih an beiseina an mangṭha a ṭul leh ta. 

Liverpool coach Jurgen Klopp-a'n Watford laka inkhel bul ṭan aṭangin player pasarih ngawt a siksawi a, mahse,  Virgil van Dijk, Sadio Mane, Andy Robertson leh Joe Gomez-te an la khelh tho avangin chak loh chhuanlam tur a awm lo. 

Chelsea hian minute 13-na lekah goal hmahruai an khung a, Alisson aia luhtir Adrian leh Fabinho chetsual vang a ni. Right back kum 18 mi Neco Williams chuan Fabinho hi ball a pe a, Brazilian midfielder-in a dang per. 

Fabinho hian hmun him lamah ball hi tlawh phei hram a tum a, Willian ke bulah a tla ta zawk. Willian-a'n a chance neih ṭhatah holam takin a shot niin lang mah se Adrian chuan a lo man nghet zo lo a, a goal! Liverpool-in na takin an nawr let zui a, mahse hun rei tak hnua Chelsea si ban nghaktu Kepa Arrizabalaga chuan a zawn zatin Mane, Curtis Jones leh Divock Origi te 'shot' chu ṭha zetin a dang. 

Beiseina nen Liverpool-in second half an ṭan a, goal khungtu erawh Chelsea bawk an ni. Everton fan Barkley chuan field chanve aṭangin ball a tlanpui a, Adrian man theih lohin minute 64-naah ṭha zetin a khung. 

Fabinho bawk chu dem tur a ni a, Barkley-a'n ball a tlanpui lai dang turin a hna a thawk ṭha tawk lo. Chelsea tan Mason Mount chuan freekick aṭangin bar a tih per a, Olivier Giroud-a hun ṭha neih chu Adrian chuan ṭha zetin a dang bawk. Barkley chuan, "Everton fan ka ni a, Liverpool laka goal khung hi chu engtiklai pawha thil châkawm a ni. Reds laka goal khung hi ka tan chuan a ropui hle," tiin a sawi. Chelsea tana match ruk chiah la khel Billy Gilmour chuan Blues tan inkhel bul a ṭan a, kum 18 mi midfielder hi en kan a harsa. Ball a keng ngam a, tlarhnung puih a thiam a, a hunah a tawlh hma thiam hle bawk - midfielder dik tak a ni. 

Reds-in Champions League last 16 first leg-a Atletico Madrid 1-0 a an ngam loh hnuah ngai an awh leh tawh lo. Premier League-ah harsa takin West Ham an hneh hram a, Watford lakah an tlawm zui a, Chelsea an ngam lo leh ta. 

Season hmasaa Liverpool-in Premier League nomawi chawi an inbeisei em em laia an chetsual lai hun kha January thla tawp lam leh March inkar a ni a, kumtira an talbuainain league nomawi a thlauh tir. Kum 2020 a her chhuak a, kum tirah bawk Reds an talbuai leh ta - Premier League-ah hma an hruai fal avangin an dinhmun a himah a ngaih theih a, FA Cup an mangṭha a, Champions League-a an dinhmun a derthawng bawk. Liverpool hian Inrinni zanah league match khel turin Bournemouth an mikhual dawn a, March 11 zanah Champions League last 16 second leg-ah Atletico Madrid an mikhual leh bawk ang. 

Liverpool hian FA Cup hi third round aṭangin an khel ṭan a, an match hmasa berah Everton chu 1-0 in an hneh. Merseyside derby-ah hian naupang rual an khel a, goal khungtu chu Jones a ni. Reds hian fourth round-ah senior player engemawzat khelhtir chungin League One club Shrewsbury Town chu 1-1 in an inhnehtawkpui a, replay khelh a ṭul phah. 

Replay khelh hun hi Premier League thlasik chawlh lai a ni a, Under 23 squad chuan coach Neil Critchley hoin Shrewsbury hi 1-0 in an lo hneh - Neil hian March 2 khan Reds a chhuahsan a, League One club Blackpool a enkawl. 

Thawhlehni zanah senior player langsar khel nual chungin Liverpool an inlan leh ta a, junior team-in an hruai thlenna round of 16 paltlang zo loin an tla.