Cardiff manager Warnock pawisa an chawitir

Cardiff City manager Neil Warnock chu March 31 zana Chelsea nen an inkhelh zawha referee chungchanga a thusawi avangin £20,000 chawitir a ni a, Nilainia FA-in a chungchang an ngaihtuahna senso £2,500 an chawitir bawk.

Cardiff boss Warnock chuan, "Kar hnih liam ta khan Maurizio Sarri chuan referee chungchang a sawi zui ve tho a, hrem a ni lo. Club tenau zawk ten thutlukna dik lo an tuar ka tih khan rilru kawi zawnga sawi ka ni lo. Ka sawi tum chu referee ṭanpui turin VAR a la awm lo ka tihna lam zawk a ni," tiin a sawifiah.

Welsh club-in Chelsea an hneh loh ṭum hian Cesar Azpilicueta chuan chiang taka offside chungin an siphurh chu minute ruk chiah a awm tawh tihin a sut a, hemi hnu hian substitute Ruben Loftus-Cheek-a'n London club tan chakna goal a khung zui avangin Warnock a lungawi lo hi a awm hle.

Cardiff manager hi pawisa chawitir mah se zanina Crystal Palace an mikhual hunah technical area-ah a awm thei dawn. Bluebirds hian Palace hi an hneh a nih pawhin Brighton & Hove Albion-in Pathianni zana Arsenal an hneh chuan an relegate tho ang. Tun season Premier League-ah Fulham leh Huddersfield te an relegate tawh a ni.