Europa League last 16 khel tur Rangers

Khelmuala a hnathawh ropui kan hmuh ṭhin Steven Gerrard a la danglam lo. Boot bunin khelmual chhung rap tawh lo mah se a thluak hmangin hna ropui a la thawk reng a, Rangers chu Europa League last 16 a luhpui leh ta. 

Rangers hian Sporting Braga chu khualmualah 1-0 in an hneh a, inkhel hmasa nena belhkhawmin 4-2 in an chak. Scottish club-in kum 2011 hnua a vawi khat nan Europa League round of 16 an lut leh ta a, Gerrard hoin an insiam thar mek zel. 

Scottish club goal awmchhun hi Liverpool academy chhuak Ryan Kent-a khung a ni a, Liverpool chherhchhuah pahnihin ropuina ramah Rangers an hlangkai tiin a sawi theih. 

Braga leh Rangers inkhel hi Nilaini zana Europa League round of 32 second leg inkhel awmchhun a ni a, nizan khan match dang khelh a ni. 

Kum 2005 Champions League final-ah khan Liverpool chuan AC Milan lakah inlehthalna ropui an lantir a, hetihlaia Reds captain Steven Gerrard chu hna ropui an thawh theih chhan a ni. 

Coach a nih hnuah pawh 'Captain Fantastic' tia hminglem an pek hian a rilru huaisen a lo la thlah lo a, Braga hneha Europa League last 16 an luh theih chhan hi round of 32 first leg-a an comeback ropui vang a ni tiin a sawi theih. 

Ibrox Stadium-a team pahnih intawn hmasakah khan Rangers hi minute 60 chhungin 2-0 in an hnufual hman. Mahse, Scottish club-in an pu rilru huaisen ang puin an bei let a, a tawpah 3-2 in an chak daih. 

Heti chung hian Rangers hi dinhmun ṭha zawka sawi theih an ni lo - mahni mualah goal hnih an chhuah a, khualmuala la leng tur an nih bawk si avangin an dinhmun a derthawng.

Steven Gerrard-a'n an dinhmun a hrechiang a, counter attacking football chu innghah nana hmangin tlarhnung lam an veng uluk hle. Minute 61-naah counter attack hmangin goal an hlawh chhuak. 

First leg-a Rangers 'hero' Ianis Hagi chuan Kent tan ball ṭha tak a siamsak a, kum 23 mi Kent hian cool zeta khungin chak nan an hmang - hun tawp thlengin Braga hian a chhan letna tur an nei lo a, an tlawm. 

Rangers hian defensive game mawi tak an pholan rualin 1-0 leka an chak hi an vanneih ṭum a ni lo, tia sawi theih a ni - Scott Arfield chuan a hun ṭha neih a hman ṭangkai loh bakah a goal khunga a ngaih chu offside vanga pawm 

a ni lo. 

First leg-a goal hnih khungtu Hagi chuan Rangers tan  penalty a khung lo bawk a, Kent chuan goal khat aia tam khung theihna remchang nei mah se a chhawr bik lo. A tawpah erawh Rangers an chak ta tho a, European football-ah an kal zel. 

Rangers-in club dang zawng aia Europa League round of 32 an  khelh hma chhan hi Porto vang a ni. Portuguese club hian nizan khan last 32 second leg inkhelah Bayer Leverkusen an mikhual. 

Team inhal Braga leh Porto stadium inkarah minute 45 bak hun hman a ngai lo a, heti taka stadium inhnaih a nih avangin UEFA chuan club pahnih ṭantute inkarah buaina a chhuah a hlauh avangin Braga hi an khelh hma tir. 

Braga hian Rangers lakah chance an nei ve nual tho - mahse Portuguese striker Paulinho leh left back Nuno Sequeira te chuan an hun ṭha neih goal-ah an chantir thei lo a, Rangers goalkeeper Allan McGregor chet ṭhat zan an tawng tel chu an vanduaina a ni. 

Rangers-in kum 2011 khan Europa League last 16 an lo khel tawh a, hemi season hian Champions League group stage aṭanga tlain round of 32 aṭangin an khel ṭan. Kum 2011 hnuah Europa League last 16 hmel an hmu leh dawn ta a, a aia sang zawk zel an beisei ang. 

Ka player-te ka chhuang takzet a, an khel ṭha hle a ni. Ball chan tam kha kan tum a ni lo a, mahse kan chan veleh na taka nawr nghal zel kha kan ruahmanna chu a ni. Vanneih vanga tun dinhmun hi thleng kan ni lo a, theihtawp kan chhuah rah kan seng a ni. 

Rangers jersey kan ha a, beisei ang result kan nei lo a nih chuan sawiselna a lo thleng dawn tih hi kan hrethiam. Mahse, chung sawiselnate chu huaisen taka kan pawm mai a ngaih chang a awm. Zaninah hun ṭha kan nei dawn tih kan hria a, kawng thui tak kan kal a ni. 

Round of 16 draw thlen hun tur kan nghakhlel a, kan hmaa inchhawp apiang hmachhawn turin kan inpeih a ni. 

- Steven Gerrard, Rangers manager