Season tawpah ka hma hun a chiang ang - Allegri

Massimiliano Allegri chuan season tharah hna dang a thawk dawn em tih a la chiang lo tih a sawi a, tun season tawp hunah Juventus President nen inbiakna an neih tur thu a sawi chhuak.

Italian manager hian Juve chu a zawna a vawi riat nan Serie A champion a nihpui leh der tawh. Mahse, nomawi chawi an tumna lian tak Champions League-ah erawh Ajax hneh loin quarterfinal-ah an zinkawng a tawp a ni.

Kum 51 mi Allegri chuan, "Season tawp hunah Andrea Agnelli nen ngun takin kan inbia ang, club hma hun leh thil tumte chiang takin kan sawi ang. Turin club hian chona hmachhawn tur a la ngah a, chumi zinga tel ve tur chuan kei pawhin ngaihtuahna chu ka nei," a ti, Juve hi chhuahsan tumna a neih rih loh hmel.

Arsenal aṭang an lakluh tur Aaron Ramsey chungchang an zawhna chhang ngalin Allegri chuan, "Aaron Ramsey kan chang thei hi kan vannei. Ani hi player puitling tak a ni a, tharum a neih bakah a timing a ṭha em em bawk," tiin a sawi.