Theihtawp kan chhuah zel dawn - Klopp

Zanin dar 12:15-ah Barcelona hneh lo hlim Liverpool-in Premier League match an khel dawn a, an mikhualna ramah Newcastle United an lenchilh ang.

Jurgen Klopp chuan, "Tun hnaia kan khelh danin minti lawm em em a, kalzel turin theihtawp kan chhuah ang. 'Title race'-a tel chuan a chauh theih loh a, tum sang tak kan nei a ni," a ti a, nomawi a thlir.  Liverpool hi Champions League-a 3-0 a Barcelona ngam lo hlim an ni a, an chau dawn tih a chiang a, Magpies hmachhawn hi a awlsam lo ang - Klopp ngaihdan erawh a dang thung. 

Reds manager chuan, "Nou Camp-a kan match kha kan ngaihtuah leh tawh lo a, tuna kan hna chu Newcastle chauh ngaihtuah hi a ni tih kan hria," a ti. Liverpool-in second leg-ah Barca hmachhawn leh dawn mah se 3-0 a an chak lohna hi lehthal leh a harsa dawn a, an beisei Champions League nomawi an thlir liam mek. 

Premier League-ah thawnthu a danglam tam lo. Match khelh zat inangah Manchester City chu point khatin an phak lo mek a, an hmabakah match hnih chauh a awm tawh -  tawlhthluk a thiang lo. City hian Thawhṭanni zan dar 12:30-ah Leicester City an mikhual dawn a, Foxes zawha an hmachhawn tur hi Brighton an nih avangin an chak a nih chuan City hi champion chiang ang hiala sawi theih an ni ang.

Klopp chuan, "Newcastle hneh an harsa dawn a, mahse anni hneh dan tur chiah hi kan ngaihtuah chu a ni. Thawhṭanni zanah team dangin eng nge an tih kan ngaihven lo," tiin City result an ngaihven loh thu a sawi. Liverpool fan-ten thu lawmawm lo hriat tur an nei a, chu chu Naby Keita inhliam thu a ni. Barcelona laka hliam vanga lakchhuah ngai midfielder hi thla hnih tal a chawlh a ngai dawn. 

Klopp chuan, "Keita hi thla hnih tal a chawlh a ngai dawn a, keini mai ni loin Africa Cup of Nations khel tur Guinea tan chanchin lawmawm lo tak a ni," tiin a player dinhmun a sawi. Rei tak hliam vanga a chawlh hnuin Alex Oxlade-Chamberlain chuan tun season-a a vawi khat nan Huddersfield a hmachhawn a, hma a sawn zel thu Klopp chuan a sawi. 

Reds manager chuan, "Squad-ah chuan a awm ngei ang a, inkhel bul ṭan tur erawh kan la sawi leh ang," tiin Keita inhliam karah Ox-a'n hma a sawn zel thu a sawi bawk.Tuna fans zawhna ber erawh Liverpool hmachhawn tur Newcastle United manager Rafael Benitez hian a club hlui, a tlak tlum em em ṭhinna Liverpool hi a duhsak ang em, tih hi a ni ta. 

Magpies hi an relegate dawn lo chiang tawh a, Europe an beisei thei tawh lo bawk - 'khelh chhan tur an nei tawh lo' tia sawi theih tak a ni a, Benitez hian a naute hi eng ang takin nge a rawn rem dawn tih chu thil hriat châkawm tak a ni.