United starting eleven-ah De Gea

Manchester United goalkeeper tun hnaia chesual nasa David de Gea chuan Pathianni zan dar 6:30-a Huddersfield an tlawh hunah inkhel bul a ṭan dawn.

Norwegian manager Ole Gunnar Solskjaer  chuan, "Tunkar chhung zawngin David-a'n training ṭha takin a nei a, a khel dawn. Season ṭha tak a hmang a, tun hnaiah a ṭha lo zawngin a chanchin an sawi nasa a, hei erawh a hmachhawn ve a ṭul a ni. Pathiannia inkhel hmachhawn turin David hi a inpeih a ni," tiin a sawi.

Spanish keeper De Gea hian an match hnuhnung bera Chelsea an hmachhawn ṭumin ho lam takin goal a chhuah a, Champions League-ah Barcelona nen an inkhelh ṭumin a chesual a, Everton nen an inkhelh ṭuma a tih 

ṭhat tawk loh bawk avangin sawisel a hlawh hle. Amaherawhchu second keeper Sergio Romero chu khup hliam vangin a inlan thei lo a, Solskjaer tan thutlukna dang siam thei a ni lo a, De Gea rin chu a tih theih chhun a ni.

Solskjaer chuan, "David-a hi a inringtawk a, kan match hmabak pahnihah hian goalkeeper ṭha a nihzia a pholang ang. Amahah hian ka rinna zawng zawng ka nghat ngam a ni," tiin sawiselna karah a chhan zel. United hi Premier League match hnuhnung pariatah vawi hnih chauh an chak a, paruknaah awm mekin an match hmabak pahnih an chak a nih pawhin Champions League khelh hi an kutah a awm tawh lo. An goal difference thlirin Chelsea-in Pathianni zana Watford an hneh chuan Solskjaer-a hote hi palina an ni pha tawh lo ang.

An hmalam hun thlirin Solskjaer chuan, "Season thara Champions League khelh hi kan la tum reng a, kan tling ta lo a nih pawhin player agent ṭawngka aṭang chuan player ṭhahnem tak kan zinga rawn tel duh an awm. Kan club sum dinhmun a ṭha a, theihna sang tak kan nei a, hun ṭha a rawn inher chhuak leh ang," tiin a sawi.

Champions League khelh tuma United elpui Arsenal leh Chelsea te Europa League hmangin Europe-a inelna sang berah tel thei dinhmunah an ding. Chutihrualin Premier League ngaihthah thei an la ni lo a, Chelsea leh Watford inkhel tur ang bawkin Pathianni zan dar 9:00-a Arsenal leh Brighton & Hove Albion inkhel turin ngaihven a hlawh ang.

Gunners khingpui tur Brighton hi an la him loh avangin Emirates Stadium-a inkhel tur ni mah se Unai Emery hote tan a awlsam dawn lo. Chutihrualin an player neih dan thlir chuan team pahnih an inthlau a, league match vawi thum chak tawh lo Gunners chak hun a inherchhuah a rinawm.