Vawiinah Mapuia Cricket League final Record nei ṭha Kulikawn hmaah Chhinga Veng

Mizoram cricket-a inelna ngaihhlut hlawh bera chhal ngam, sum tamna ber ni bawk Mapuia Cricket League final chu vawiin hian khelh a ni dawn a, Kulikawn CC leh Chhinga Veng an intawng ang. 

Suaka Memorial Cricket Ground, Sihhmui a inkhel tur hi zing dar 10:30-ah ṭan a ni dawn a, inkhel hmuhnawm a beisei ngam ang. LPS 1 chuan inkhel hi live-in a pe chhuak dawn a ni. Kulikawn leh Chhinga Veng hi tun season-ah vawi thum an intawng tawh - Kulikawnin vawi khat hnehna an chang a, 3C hi vawi hnih an chak tawh thung. 

MCL season hmasa pahnihah khan Kulikawn hi tuma tluk rual lohin a zawnin an champion a, tun thlengin Mapuia Cricket League-a a zawna champion thei awmchhun an la ni ta reng.

Kulikawn record hi rei tak ding lo thei dinhmunah erawh a ding ta a, a thaichhe thei tur chu Chhinga Veng an ni. 3C hi MCL champion lai an ni a, Kulikawn hi an ngam chuan a zawna MCL champion thei Kulikawn kiangah an hming ziahlan a ni ang. 

Vawiin inkhela chak zawk hian Rs. 1,15,000 an dawng dawn a, pahnihna dawn tur erawh Rs. 65,000 a ni - a inthlauhna hi Rs. 50,000 a tling a, match khat lek avanga heti zata sum indawn tam hleih hi team pahnihin an duh lo ang. 

Team pahnihin player an nei hrawl a, an chet ṭhatnia mahni club champion pui thei tura theihna nei sang ṭhiau an ni - Kulikawn tan Raihan Jomeel ringawt pawh hi thlamuanna tham a ni a, Assam batsman hian qualifier 1-a Chhinga Veng an tawn ṭum khan run 43 a vaw chhuak. 

Kulikawnin Michael Lalremkima an kawl bawk a, Mizoram cricket-a tawnhriat ngah ber pawl hian season duhawm tia sawi tur hmang rih lo mah se pressure sangah mamawh a zual ṭhin. Leg spinner Moses Ramhlunmawia chu bowling lamah Kulikawn innghahna tur a ni dawn - Moses hian match ngaah wicket 10 a la tawh a, chung zinga wicket li chu qualifier 1-a Chhinga Veng nen an intawn ṭuma a lak a ni. 

Chhinga Vengin K. Vanlalruata, Lalruatdika leh Raj Kumar Thakur an nei a, thlamuanpui tham vek an ni. Mizoram cricket-ah chuan K. Ruata chanchinin sawi a hlawh fo a, a chanchin hrilh nawn kan ngai lo. Durtlang tlangval khelh ṭhat leh ṭhat loh hian Chhinga Veng dinhmun tur thui takin a hril ang. 

3C tan Lalruatdika'n MCL khelh mekah beisei phak rih lo mah se a theihna sanzia enin Kulikawn tan ngaihthah ngawt a chi lo ang tih a lang a, Samik Amal Das hi thai bo mai atan chuan a ṭha mah mah bawk. Left arm chinaman (vei vawm spinner) Raj Kumar Thakur hian bowling chauh ni lo, batting lamah pawh a thawh hlawk hle - match ruk a khelhah run 105 a siam tawh a, wicket nga a la tawh bawk.